Shillong, May 11: Tura-ni writer/director Jenifer Datta Areng-ni project-ko Marche Du Film-o a·gilsak gimikni producer ba jawilwat tarigipa manderangna mesokna gita da·o May 16 aro 27 tarikni gisepo ong·atenggipa Cannes Film Festival-ona okamatenga.
European Union delegate-rangni ong·atgipa European film festival-rangko namdapatna gita European Commission, 2018 bilsini November jao dingtangmancha project-ko a·bachengatahachim aro ia project-ko European Commission-ni tangka paisarangko dakchake on·anichi Goethe-Institut, Institut francais aro Cineuropa nangrime chalaiengachim.
Goethe-Institut-ni dilanichi, Institut francais aro Cineuropa baksa nangrime Jenifer Datta Areng-koba, ‘Journey to Europe’ project-na Marche Du Film-o bak ra·na gita seokaha. Ia ‘Journey to Europe’ project-ara bilsianti a·songo ong·atrongenggipa European film festival-o pangchake India-ona European Union-ni watatako man·gipa delegate-rangni a·bachengatgipa project ong·achim.
Jenifer Datta Areng, 2013 bilsio Mumbai songjinmani St Xavier’s College-o Sociology aro Psychology-ko poraie graduate ong·a bakan an·tangni jawilwatrangko sena, direct ka·na aro edit ka·na a·bachengaha aro 2014 bilsio uni kan·dikgipa ‘Little Things’ jawilwat, Calcutta-ni SRFTI Satyajit Ray Film Institute-o Best Student Film-na nominate ka·ako man·aha. 2016 bilsio uni tarigipa ‘Thank You For Watching’ jawilwatnaba ua 2017-ni DIFF (Dharamshala International Film Festival)-o film fellowship-ko man·aha aro ianon ua national award-ko man·gipa aro film tarigipa Gurvinder Singh-ni ning·o jawilwat tariani bidingo skie ra·aha.
2018 bilsio Jenifer-ni bon·kame tarigipa ‘Tear’ jawilwat, jeon Vinay Pathak aro Trimala Adhikari kal·ahachim, ia jawilwatko 2019 bilsio Kerala a·dokni IDSFFK-o mesokaha.
‘Storm Bird’ jawilwatan Jenifer-ni ro·e tarichenggipa screenplay ong·aha aro ia jawilwat, 2021 bilsio European Union, Cineuropa aro Initiative Film-ni France a·songo ong·atgipa susaanio bakko ra·e golpo seanina boksisko man·aha.
Cannes Film Festival-o bakko ra·na gita okamatako man·engani gimin Hub News baksa agangrikengon, “Ian angna jumang gitasa ong·pilaha. A·gilsakni pilak jawilwat tarigiparangan Cannes-ni bak ong·pana namen kusi ong·a aro iako Dominic-ba ma·sigen,” ine Jenifer parakataha.
