TURA, Oct 6: Tura Golfers Association-na rasong chabeani ong•aha, maina doloni saksa, Johnwell G Momin re•baenggipa November jao Goa-o ong•na sienggipa National Games-o Meghalaya a•dokni bimingo golf kal•na seokako man•aha. Uni kal•na sienggipa gadangara Professional Players Category ong•a.
Johnwell G Momin, uan Tura Matchakolgre-ni Rojinush R Marak aro Promila G Momin-ni depante ong•a. Ua bilsi 14 ong•on golf kal•na a•bachengaha aro uko golf kal•na gisik nangatan baksa skigipara Garo Hills jolo golf kal•na gisik nanggipa aro Tura-ni gitcham MLA Billykid A Sangma ong•achim.
Johnwell G Momin-an A•chikrangni gisepode India-ni professional gadango golf kal•chenggipa ong•a. Ua 2014 bilsio PGTI Qualifying School-o skie ra•aha aro apsan bilsion Shillong Golf Course-o Chief Minister Cup-na kal•susaanio bak ra•aha. Ia susaania Professional Golf Tour of India (PGTI)-ni ning•o ong•atgipa National Championship Cup ong•achim. Johnwell, state level tournament-rangoba bang•en cherongaha aro adita salrangna skang uni cheania ia bilsini August jao Shillong Golf Course-o ong•atgipa The Cloud 9, Summer Golf Tournament ong•a.
Jasasan ong•kuenggipa demechikni pagipa Johnwell G Momin graduate ong•oba sorkarini kam dongkugijagipa ong•a aro ua golf kal•na gisik nanggipa bi•sarangna Golf Coach dake tangka man•achisa nokdangko nirokenga. Ua armed forces aro air forces-ni manderangnaba golf kal•aniko skie on•enga. Da•ororo ua nokdangna somoi on•na nangengan baksana National Games-na seokako man•on Meghalaya Police Service-ni Mains Exam-naba tarisoengani gimin somoi jakchakjabegipa mande ong•enga.
Garo Hills jolode bang•gija manderangsan golf kal•kuenga, jemangan Danakgre-o BSF Camp-ni chalaienggipa Durama Golf Course-o kal•tokenga, aro uan 9 Hole Golf Course ong•a ine Johnwell songbad segipana aganaha. Tura jolni skulrango training camp-rangko ong•ate golf kal•na gisik nangate giproroatanian Tura Golfers Association-ni mingsa mongsonggipa miksonge re•mikkangani ong•a aro jenan ua dol Sports Department-ni tangka paisachi dakchakaniko bi•manaha.
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
