Tura, Nov 15: Tura songjinmani saksa kriket kal·na jaksrapgipa Tra Ajima A Sangma, me·chik kriket kal·gipa dol, Women’s Challenger Team C-ni membor-na seokako man·anganichi Meghalaya a·dokoni bian skanggipa ong·e India a·songna kal·na gita cholko man·chenggipa ong·aha.
Meghalaya a·doko beben kriket kal·na sapgiparang bang·en donggenchimoba, aro a·jatangonin kriket kal·gipa mitamrang Ranji Plate level-ona sokangpilgipa donggenchimoba, Tra Ajima, gipinrangna nambate kal·ani gimin India-na kal·na gita a·dokoni seokako man·chengeming sakgipinrangna bate niksengangskaaha.
Uni iandakgipa gadangona sokanganio, Meghalaya Cricket Association (MCA) aro Tura-ni bak dongpagipa TDCA, iamangni on·kangani gnang jottonrang ka·anina uamangko mittelpilskana gita krachongmota.
West Garo Hills, Tura-ni Kongbe A·ding gittimo 1997 bilsini January 2 tariko atchigipa Tra Ajima Sangma, chonmitingo ua St. Xavier’s School-o poraiani ja·man bangkiko Tura-ni Auxillium Secondary School-o matchote poraiaha. Uandake, HSSLC-ko Don Bosco HS Section-o matchote dakani ja·man apsan college-on graduate-ba ong·angaha.
Tra Ajima Sangma-ra, Pa Paul Sangma aro Ma Joshilla A Sangma sagini gnigipa demechik ong·a. Namgipa agan-ku·pattianirangko on·anio, uni poraianio aro gimik dakaon dakchakanirangko on·anio aro mongsongbate kriket kal·na namnikgipa ong·e uni nisanona daarianio uni pagipa una dakchakanikoba on·aha.
Tra Ajima, basketball kal·na aro gitrangko knae rona namnikgipa ong·omangba, chonaonin ua kriket kal·nade dingtangmancha gisiko nangbaskaachim. Batanggimin 2019 bilsio U23 Women’s team-o a·dokna kal·anichi ua skanggipa chang ong·e cholko man·chengaha. Uandake, 2020 bilsioba MCA Senior team-o seokako man·angtaia baksana ia bilsio National Cricket Academy-o ranta ka·anirangko dakna seokako man·angaha. Uni on·kanganiko aro kriket kal·na jaksrapaniko nike ru·utgija salrangna skang, India-ni Women’s Challenger, Team C-o seokako man·angaha.
Ru·utgija salrangna skang matchotanggipa Senior Women’s Inter Zonal T20-ko kal·anganioba, chang 4 maiden-rangko man·a baksa sakbri wicket-rangkoba ra·e Tra Ajima, changsatai kriketna uni gisiko nanganiko aro kal·na sapaniko kamrangchi mesokangkuaha.
Sports ba kriket kal·susaanio uni iandakgipa gadangona sokdoanganina, ia bilsi Republic Day-ko Tura songjinmao manianganio Meghalaya sorkari, uko dingtangmancha mande ra·pilskaanikoba dakangaha.
