Tura, Aug 26: Tura jillani ramarango aro mongsongbate footpath ba manderangni rama re•chakenggipa biaprango ma•manti bosturangko palengani a•sel ramarango apchangket ong•anirangko nikna man•engon, Sukrobar salo dingtangmancha West Garo Hills a•jani district administration, tom•e chanchirimaniko dakdilangenba, ramarango palbadingenggipa manderangko biap dambriona apjitatna tik ka•e donangaha.
Ia tom•aniko West Garo Hills a•jani Deputy Commissioner Swapnil Tembe-ni dilanichi DRDA conference hall-o ong•atangaha aro ia tom•anio, Tura Municipal Board-ni CEO Rikse R Marak, dingtang dingtang area development committee-ni membor-rang, traders association-ni membor-rang, hawkers association-ni membor-rang aro West Garo Hills-ni police officer-rangba dongpae bak ra•angaha.
Ia tom•anio, ramarango palbadinggiparangko dingtang biapona apjitani gimin chanchiangengon, dingtang dingtang nangchongmotgipa bosturangni damrangko tik ka•taiani giminba chanchiangaha, jeon tom•anio bak ra•gipa dingtang dingtang dolni membor-rang, manderangni nangchongmotgipa bosturangni dam rakbatenganina aro ramarango bosturangko palbadingengani a•sel re•ruraenggipa manderang neng•nikanirangko chagrongna nangtokengani gimin janapangtokaha.
Ia tom•anio District Administration-ni official-rang, dingtang dingtang bosturangni dam rakbatengani a•selko tom•anio bak ra•giparangna talate on•angengon, badiaba manderang an•tangtangni man•gnina niam gri kamrangko ka•ahani a•selsa manderangni nangchongmotgipa bostuni damrang rakbatangaha ine parakataha.
Tura jillani ramarango palbadingenggipa manderangko apjitani gimin chanchiangengon, ia badinggiparangko, Tura Urban Hub-o bangbang ong•e dongenggipa dam 80 stall-rangona, Araimile-ni be•en palchakgipao bangbang ong•e dongenggipa dam 35 biaprangona, Nazing Bazar-ni bangbang ong•e dongenggipa dam 25-30 biaprangona aro Dakopgre-o donggipa Tura Housing Complex-ni bangbang ong•e dongenggipa dam 25-30 biaprangona apjitangna gita tik ka•e donangaha.
Iani bidingo bostu palbadinge cha•enggipa manderangko re•baenggipa September 15 ba una skangan, DC office-ona re•ange, DRDA office-o an•tangtangko register ka•echina gitaba District Administration-ni official-rang didiataha.
Ia tom•anio dingtang dingtang dolrang baksa chanchirimengon, footpath-rangko manderang re•tona gita taridape on•china, gipin biaprangoniko ra•baenggipa be•enni bosturangko name nirokchina, Tura jillao chu dokkanrang nangana bate bang•dugaengahani gimin chu dokkanrangko jillani a•palrango donatna nangengani gimin dingtang dingtang dolni membor-rang, district administration-na agan-ku•pattianirangko on•angtokaha.
