Tura, Oct 6: Budbar attamni 7:30 bajimango, Tura jillani Rishipara jolo rang•gitik a•a be•wakanganichi, gittimo donggipa bang•a nok-jamrangan nisiatako man•tokaha aro jolo songdongenggipa manderangna kenjagokataniko on•angaha.

Ia antigimikan mikkarang waangahani a•sel Rishipara gittimo a•arang be•wakangaha ine chanchichipenga.

A•a be•wakangani ja•man Police aro Disaster Management-ni official-rang, a•sel ong•gipa biapona re•ange, manderangna dakchakanirangko on•angaha.

A•a be•wakanggipa nokdangrangna a•a be•wakdapanganiko champengna gita tarpaulin-rangko on•aha aro a•sel ong•ani salo, gittimni community hall-o manderangna merong, dal, alu, rasin, kari, to aro uandakgipa cha•ani bosturangkoba suale on•angaha.

Rishipara gittimo songdongenggipa saksa Susmita Rishi-ni parakatani gitade, 2018 bilsini September 10 tarikoba apsan daken, ia jolo a•a be•wakangahachim aro ua somoio iandake a•a be•wakangani gimin ramako tarichina gita uamang, gittimni secretary-ko aganahachim. Indake ong•genchimoba ua somoio gittimni dilgiparang maming ja•kurangko de•jaha aro da•o a•a be•wakani uamangni nok sambaonan sokbaahani gimin ian uamangna aro uamangni dedrangna kenchakna nangani ong•engaha ineba Rishi aganaha.

Rishipara jolora a•dram dakgipa biapsa ong•e mikkarang waani somoiode ka•sinsin a•arang be•roroangenga aro ian jolo songdongenggipa manderangna namen kenchakna nangani ong•enga ine sakgipin Sameer Rishi parakatskaaha.