Tura, July 5: Katolik mondolio an•tangko on•kange dangdike on•anggipa Bishop Emeritus George Mamalassery, bilsi 92-na janggi tange 2024 bilsini July 5 tariko, Tura-ni Holy Hospital-o bon•kame janggi galaha.
Bishop George Mamalassery, Roman katolik mondolina aro Tura-o songdongenggipa manderangna, on•kange dangdike on•angaha.
Ua, 1979-2007 bilsirango, skanggipa changna Bishop ong•e dangdike on•angaha.
A•dokni Skotong Minister Conrad K. Sangma-ba uni sianina kalimpaaniko dakangaha. Ua nokdangni manderangna, ripengskarangna aro Meghalaya a•dokni kristian manderangna uni kalimpaaniko parakataha.
Bishop George Mamalassery, 1932 bilsio Kerala-o atchiaha aro uni dambekuengon uni maa paa uko done siangaha. Bang•a neng•nikanirangko chagrongna nanggenchimoba, ua Isolna dangdike on•a mangsongaha aro uni poraianiko matchotman•e, 1960 bilsini April 4 tariko, toromko dilna uko Kamal songaha.
Uni gisiko dangdike on•a skanian gape, Meghalaya a•dokni Garo Hills a•jani ning•tugipa aro neng•nikaniko man•enggipa biaprango kam ka•na ua an•tangko kang•kare kaaha. Indake, so•sojengjeng aro neng•nikani somoirangoba, manderangni janggi tangani gadangko namdapatna ua an•tangko on•kange dangdike on•aha.
Indake, ua Tura aro Baghmara Parish-ni dakchakgipa Kamal ong•e ru•uta bilsirangna dangdike on•ani ja•mano, 1970 bilsio Dalu Parish-ni Kamal ong•skaaha.
1971 bilsio Bangladesh Liberation War ong•engmiting somoio, uni dangdike on•enggipa Parish-ni manderangna, dongchakani biap, cha•a ringani aro gipin biapona apjitatanio dakchake on•aha. 1979 bilsini February 8 tariko, Holy See-ni gita uko Father George Mamalassery songaha, unikoa, uni bilsi 46 ong•engpition uni dondikgija jotton ka•ani aro dilgipa ong•e dilna sapani gimin 1979 bilsini March 18 tariko, uko skanggipa changna Tura-ni Bishop songaha.
Ua Bishop ong•e, dam 14 centre-rangko aro dam 23 gital Parish-rangko songe on•aha, bang•a gilja nokrangko, presbyteries convent-rangko, sanna bannani Sam sualchakram biaprangko, bi•sarangna dongchakani nokrangko aro skul-rangko rike on•aha. Ua Salesian aro Jesuit-rangkoba Tura aro Williamnagar-o college-rangko rike on•china okamataha.
Bishop Mamalassery, Garo Hills-ni dam 5 a•jarango, ge 34 dispensary-rangko rikaha aro 1993 bilsio, ge 150 palangrang donggipa Holy Cross Hospitalko Tura-o a•bachengate on•angaha. Ua Rino Simonetti School of Nursing-koba Tura-o a•bachengataha aro dingtangmancha nirokaniko nangenggipa bi•sarangnaba Monfort Centre-ko kulie on•china Montfort Brother-rangko didiangaha. Una agreba, ua Diocesan Social Service Centre-o Bakdil-koba a•bachengate on•angaha.
2007 bilsio retire ong•ani ja•manba, Bishop George, Priest’s Home-oni Diocese-na dangdike on•angkuaha. A•dok sorkarini gita una Pa Togan Sangma Award-koba on•aha. Unbaksanaba, 2019 bilsio, University of Science and Technology, Meghalaya (USTM)-ni gita, uni lekka pora, an•sengbaljokani aro songsalko tang•doatanio on•gilpaanina, una Honorary Doctorate-koba on•aha.
Na·simang ia video-koba nina man·gen:
Na·simang iakoba poraina man·gen: Gambegre-ni neng•nikaniko man•enggipa chatro chatrirangna, Gamebegre-o MBOSE exam centre-ko songa
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
