Tura, Mar 24: Cha•ani tarie palgiparang, mongsongbate ruti, cake, biscuit aro uandakgipa cha•anirangko tarigiparangna Food Safety & Standards Authority of India (FSSAI)-ni ning•o dingtang dingtang niamrangko donahaoba Tura-o iandakgipa cha•anirangko tarienggiparang, tariani tarik, expiry date, cha•ani tarianio jakkalgipa bosturang, aro mitamrangde FSSAI-ni registration nombor-koba janapa gri palengani gimin ian Garo Hills-o cha•anirangko bree cha•enggiparangna kenchakna nanganiko ra•baaha.
Tura songjinmao iandakgipa bakery ba cha•ani tariani karkanarangara Tura Municipality-ni ning•on bang•bata aro iandakgipa karkanarang, FSSAI-ni niamrangko ja•rikna nangachim aro District Medical & Health Office (DM&HO)-oba register ka•e Tribal ong•gijagipa manderangde Trading for Non-Tribals (TNT) licence-rangba dongna nangachim.
Indake ong•genchimoba, Hub News-ni gita Tura-o donggipa bakery-rangko jasana am•sandie nion, iandakgipa bakery-rang ba cha•ani tarigipa karkanarang bang•batan niamrangko ja•rikjaenga ine nikna man•aha.
Iandake niam pe•aniko 2024 bilsini October jao skanggipa nikchengna man•aha, jeon cha•ani tarie palgipa manderang, an•tangtangni tarigipa rutirangko, FSSAI-ni dongimin niam gita seani gnang paljaha. Iani bidingo ning•tubate am•sandiangkuon, ia karkanao gipin cha•anirang, jekai case, misti aro biscuit-rangkoba maming see u•iatani grisa palenga ine nikna man•aha. Iani bidingo bakery nokgiparango sing•sandion, uamang cha•anirangko taridaldalon katepesa palenga aro maming saloba cha•ani namgijakode manderangna palja inesa a•kangskaaiaha.
Iani bidingo talbate ma•sie ra•na gita Hub News-ni manderang, South West Garo Hills a•jani Ampati jolrango cha•ani palgipa dokkanrangonaba re•ange am•sandianirangko dakangaha indiba ia jolrango dokkan ge•sa ge•gnina agrede bang•bata dokkanrangan Assam-o niamko ja•rike tarigipa cha•anirangkosa ra•bae paltokenga ine nikna man•aha.
Tura-o cha•ani tarigipa karkanarang iandake FSSAI-ni niamrangko ja•rikjaengani gimin Tura-o donggipa Food Inspector-ni office-ona re•ange sing•sandion, office-o kam ka•giparang chu•ongjaenga aro food inspector saksasan West Garo Hills a•ja gimikniko nirok sandienga ine official-rang ku•rachakaha. Food inspector-rangni kamrangara, cha•ani tarigipa karkanarangko nirikkian baksana uamangni licence-rangko nirokani aro FSSAI-ni niamrangko nirokaniba ong•achim.
Bakery nokgiparangni Hub News-na parakatani gitade, Food Inspector office-ni gita uamangni karkanarangko Durga Puja-ni ja•mansa re•ange niangaha indiba uni ja•mande changsaba nipiletaia dongkuja.
Indake ong•engon, re•anggipa March 21 tariko A•chik Conscious Holistically Integrated Krima (ACHIK) Krima Council-ni membor-rangba Tura-o chalaienggipa bakery ba cha•ani tarigipa karkanarangko rang•gitik re•ange nieaha aro je karkanarangan, cha•anirangko maming rongtal an•talani gri aro licence gri karkanako chalaiengachim, uandakgipa dokkan aro karkanarangko Sombar salo chipattokaha.
ACHIK Krima Council-ni chipatgipa dokkan aro karkanarangoni damsade Tura Supermarket-ni dokkan nombor 146 ong•a aro ia karkanao uamang cha•anirangko manderangni a•pal re•chakgipa biapo donahani gimin ia dokkanko chipataha. Unbaksana, Tura-ni Nakam Bazar aro Gariamat-o donggipa dokkan aro karkanakoba FSSAI-ni licence dongjani gimin ia dokkan aro karkanako ACHIK dol chipe donataha.
ACHIK Krima Council dolni gita am•sandion, Nakam Bazar-o donggipa dokkan ge•sao iandakgipa bakery-ni cha•anirangko sal 45 ong•pilahaonaba palengkua ine ma•sina man•aha.
Je dokkan aro karkanarangko ACHIK Krima Council-ni gita chipatahachim, iandakgipa dokkan aro karkanarangni chabiko West Garo Hills a•jani Deputy Commissioner-na pakwate on•na tik ka•angaha aro iandake niam pe•gipa manderangni kosako rakgipa ja•kurangko de•china gitaba ACHIK Krima Council dabiangaha.
Na·simang ia video-koba nina man·gen:
Na·simang iakoba poraina man·gen: NEHU Tura Campus “Agri-Food Connect”-ko East Garo Hills-o ong·atanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
