Tura, April 24: Tura-o Mt Sinai Secondary School-ni gital nokko Sonibar salo, Meghalaya a·dokni Chief Minister Conrad K Sangma, nokdonggae on·angaha.
Ia gital skul nokko Asian Development Bank-ni Supporting Human Capital Development-ni ning·o gong kror 2 korosrangchi rikahachim.
Ia project-ni bak gita ia gital skul noko Science lab, library, computer room, digital classroom, arts & craft room aro girls activity room-rangko man·chape ge 7 gital classroom-rangko rikaha. Ia project-o computer-ni ma·manti bosturangko, digital classroom-rangko, skulo asongchakanirangko, skigiparangna skie on·anirang, Meghalaya School Improvement Plan, Digital Library aro ki·taprang, Science Lab-ni bosturangkoba man·chapahachim.
Ia skul nokko nokdonggae on·angani somoio a·dokni Chief Minister jinmana aganprakangengon, bi·sarangni u·i-m·siani gnang skie ra·ani gamchatani bidingo agan-talataniko on·angaha.
“Chadamberangni changa sapani aro u·i-ma·sianirangko jakkalna miksonganio sorkari, dingtangmancha youth policy-ko tariaha aro ia youth policy-ni mongsonggipa miksonganian chadamberangna uamangni changa sapanirangko namdapatna cholko on·anian ong·enga,” ine Chief Minister aganaha.
Chadamberangna an·tangtangni namnikgipa janggi tangani cholrangko jako ra·na cholko on·na gita Meghalaya sorkari, ‘One Skill, One Talent’ program-rangko a·bachengatna sienga ineba Chief Minister parakataha.
“Youth policy-chi chinga chadamberangni dakna amaniko tariskana miksongenga. Ian sorkarini mikkangchi mingsa mongsonggipa dakna nanggni kam ong·enga aro ia miksonganiko chu·sokatna chinga sulsui kamrangko ka·enga,” ine Sangma aganaha.
Meghalaya a·dok gimikni dam 800 LP skulrangko tang·doatna gita sorkarini ra·gatna miksongenggipa program-ni giminba ia tom·anio Chief Minister parakataha.
“Chinga Meghalaya a·dok gimikni lower primary skulrangko sandimanaha aro bakan chinga ia skulrangko namdapatna a·bachenggnok,” ine ua aganaha.
Tura-o PA Sangma Stadium, District Museum aro Tribal Research Institute-rangko man·chape Tura jillako nitodapatna gita sorkarini a·bachengatenggipa kamrangni giminba ia tom·anio Chief Minister, jinmana aganangaha.
