Tura, Aug 26: Tura-o cha•ani aro ma•manti bosturangni dam rakbatengani a•sel manderang neng•nikanirangko man•tokengon, iandake niam gri bosturangni damko rakbatatenggipa dolni kosako Tura-ni police-rang aro West Garo Hills a•jani district administration champengatna man•ahani gimin Meghalaya a•dokni Chief Minister Conrad K Sangma, mittelpilaniko parakataha.
Iandake niam gri kam ka•enggipa manderangni kosako ja•kuko de•na man•ahani gimin an•tangni mittelpilaniko parakatengon, an•tangtangni man•gnina ia manderang, ma•manti bosturangni damko rakbatatahani a•sel manderang neng•nikanirangko chagrongna nangtokengani giminsa district administration aro police-rang, iandakgipa ja•kuko de•na nangaha ine Chief Minister parakataha.
Ramram manderangni man•gniko cha•bokna man•jana gita, manderangna nangani kri cha•ani ringanirangko on•anian sorkarini mongsonggipa daito ong•a ineba Sangma aganaha.
Tura jillani wilwilao, cha•ani aro ma•manti bosturangni dam tang•doengani gimin manderangni badi ka•anirangko man•e police-rang, am•sandianirangko dakon, adita salrangna skang rim•ako man•gipa Tura-ni BJP MDC Bernard N Marak-ni ge•etanichi niam gri bikotgipa Meghalaya Chamber of Commerce-ni membor-rangsa damrangko rakbatatanio jak donga ine police aro district administration, ma•sina man•ahachim.
Police-rangni am•sandie man•ani gitade, ia dolni membor-rang, Tura jillao cha•ani aro ma•manti bostuni damrangko rakbatatenba, dokkan dakenggipa aro bading chiwale cha•enggipa manderangoniko an•tangtangna tangka paisarangko gile ra•skaengachim.
