Tura, April 27: Gipin a•dokrangoni re•bapilenggipa manderangko COVID-19-na porikka ra•anio positive ong•anirang batroroengani gimin Garo Hills-oba COVID-19-ni giproroaniko champengangkuna gita Chibragre-o donggipa St John Secondary School aro Alotgre-o donggipa Auxillium Secondary School-rangko man•chape Tura jillao donggipa pilak skulrangkon Budbar saloni a•bachenge re•baenggipa May jani 8 tarikona chipe donanggen ine West Garo Hills a•jani Deputy Commissioner Ram Singh u•iataha.
Deputy Commissioner-ni u•iatani gitade, skulrangko chipe dontokgenchimoba da•o MBOSE-ni SSLC aro HSSLC porikkarangko ong•atengani gimin ia porikkarangkode donsogimin somoi gitan ong•atangkugen indiba porikkarangko ong•atanio COVID-ni niamrangko rakbate ja•rikangskagen.
Indake ong•engon, Budbar salonide Tura jillani ning•o donggipa pilak dokkanrangkon attam 7:00 baji dipet chiptokna nanggnok aro Robibar salode salgimikan dokkanrangko kulina man•jawa ine DC u•iataha. Robibar salrango sam dokkanrangkode kulina man•aigen aro nokona sokate on•gipa dolrangba an•tangtangni kamrangko ka•na man•aigen.
Walni curfew-koba wal 10:00 bajioni pring 5:00 bajiona ong•atanggnok ine West Garo Hills a•jani Deputy Commissioner u•iataha.
