Tura, May 31: A•gilsakni gipin biaprango gitan Tura-oba World No Tobacco Day-ko Budbar salo, ‘My Meghalaya, Tobacco Free Meghalaya’ ine pangchakaniko donenba, Tura-ni Super Market complex-o maniangaha.
Ia program-ko West Garo Hills a•jani National Health Mission-ni ning•o donggipa National Tobacco Control Program (NTCP) ong•atangaha aro ia program-ko ong•atanio, West Garo Hills a•jani Additional Deputy Commissioner (ADC) AVD Shira, jinmana aganprakangengon, ta•makkuko jakkalani namgijanirangko talate on•angenba, ta•makku jakkalenggipa manderang an•tangtangan ta•makku jakkalaniko watna skani dongjagenchimode darangba uko jakgitel ong•atna man•jawa ine parakangaha.
Ta•makkurangoni chel•e dongchina chadamberangko didiangengon, mikkangchi janggi tanganio chu•sokgiparang ong•na man•na gita an•tangtangni poraianirango gisik nangchina ua chadamberangko didiangaha.
Ia salko maniani bak gita No Tobacco Signature Campaign-koba ong•atangjolaha.
