New Delhi, July 11: IT-ni gital niamo ge·etgimin gita, mamlarangko badi ka·na songdongkamgipa mandeko grievance officer dake songna social media platform Twitter-ni somoiko ru·utatani gimin Delhi High court-ni ge·etaniko on·ani salgittam ja·man Vinay Prakash-ko kamo rakkianiko Twitter bon·kame parakataha.
Information Technology (IT)ni gital niamrangko ra·e ma·mong sorkari aro social media-oni ge·sa niksenggipa Twitter, ia dolgnian bamgrikjaengachim.
Twitter-ko India-o chalaina gita pangkamgipa grievance officer-ko kamo rakkina aro liaison office-ko songna gita United States-oni technological company, iana skang anti-chet somoirangko bi·ahachim jekon kachari jechakaha ine koboro parakataha.
Iana skangba Twitter, Dharmendra Chatur-ko India-ni resident grievance officer dake dikdiksana songangahachim, indioba ua mija June jaon ia kamko watangaha.
Janapjolna gita, mija May 26 tarikoni dipet ra·gatanggipa IT-ni gital niamrango minggipin nangchongmotgipa ja·rikna nanganirangko on·an baksana mongsonggipa kamko jako ra·e ka·angna gita chief compliance officer, nodal officer aro grievance officer-ko kamo rakkianiko nangchongmotgipa dakataha aro ia sakgittam officer-rangara India-o songdongkamgpaan ong·na nanga ineba ge·etaniko on·angaha.
