Shillong, July 17: U Tirot Sing Syiem-ni chang 187-gipa siani salko Robibar salo, Tirot Sing Death Anniversary Committee Hima Nongkhlaw aro Shillong-ni Centre for Historical Research Synod College (CHRSC) nangrime Nongkhlaw-o manidilangaha.
Ia salko manianio, dingtangmancha U Tirot Sing Syiem-na mande ra•pilskaani chin gita uni statue-ko aro Children’s Park-ko tarichina gita Tirot Sing Death Anniversary Committee, Rajya Sabha-ni MP WR Kharlukhi-na memorandum-ko on•angjolaha.
U Tirot Sing Syiem-ni chang 187-gipa siani salko manianio Rajya Sabha-ni MP WR Kharlukhi, jinmana aganprakangengon, India a•songo jakgitelanina krengdilgipa sak 115 manderangko Parliament, biming segataha aro ia sak 115 manderangoni U Tirot Sing Syiem-ba saksa ong•paenga ine parakangaha.
U Tirot Sing-ara saksa a•dokna aro a•songtangna janggitangko on•chakgipa mande ong•ani gimin uni siani salko a•dokni pilak biaprangon manina nanga ineba Kharlukhi aganaha.
Ia salko manianio dongpae jinmana aganprakanggipa gipin manderangara, NEHU Shillong Campus-ni ning•o donggipa History Department-ni Professor Amina N Passah, Synod College-ni Principal RM Lyngdoh aro gipinrang ong•a.
