Shillong, Feb 17: A·doko ru·utgijan assembly-na pu·onangnasienggipana manderangni chakpaaniko man·na gita baktangtang kamko ka·sotokengon, a·joltangni political dol, United Democratic Party (UDP), mikkangchi a·dokna kamrangko ka·na miksongenggipako chappa ka·e tarigipa dolni manifesto-ko Shillong-ni Party office-o Sukrobar salo oprake on·angaha.

UDP dolni manifesto-ko oprake on·anganio, dolni ku·wattimgipa Allantry F Dkhar, a·doko cha·bokani grigipa sorkariniko rikani, chadamberangna kam on·ani, a·doko songdonggipa pilaknan apsangrik kamko ka·ani gimin agananga baksana, gama-ge·aniko, sana-bananiko namdapatna, a·dokni gadangko tang·doatna aro minggipinrango bite gnanggipa kamrangko chu·sokate on·na gitaba ku·rachakaniko on·angaha.

UDP-ni manifesto-o a·doko ILP-ko ra·gatani gimin aro da·o ra·gatenggipa MSSRA gita dakgipa niamrangko ra·gataniko man·chapata baksana, a·dokni law and order-ko namdapatna, police department-ko bilakbatatna aro kamna biap bangbang ong·enggiparango gapatna gitaba UDP, mikkangchina ku·rachakaniko on·angkuaha.

Iarangna agreba, a·dokni tourism-ko aro home stay-rangko tang·doatna, joltango cha·aniko tarina, wata-chengani aro sika-koani ba ugitarango sorkarini gita dakchakanirangko on·na gita miksongsongsoan baksa, a·dokni chadamberangni namgnina kamko ka·na gitaba UDP ku·rachakaniko on·angjolaha.