Moscow, August 16: Ukraine-o so•sojengjeng ong•enggipa a•selrangko ru•utbatatna miksongani gnanganio aro a•gilsakni gipin bakrangoba so•sojengjeng ong•atna chanchianirang dongesa, United States-ni House Speaker, Nancy Pelosi, Taiwan-ona re•angaha ine Russia-ni President Vladimir Putin US-ni kosako matnange aganaha.
“Ukraine-o so•sojengjeng ong•anirangko niate nigenchimode, so•sojengjeng ong•enganirangko nampilatna ru•ute somoirangko US ra•enga aro Asia, Africa aro Latin America-rangoba so•sojengjeng ong•anirangko nadoatna jotton ka•enga,” ineba President Putin agandapaha.
“Taiwan-ona re•anganiara biap nina re•anganisan ong•aija indioba ua biapo so•sojengjeng ong•enganirangko bariatna aro a•gilsakni gipin bakrango tom•tom donganiko nosto ka•na miksonganiosa US kamrangko ka•enga,”ineba Putin agandapaha.
