Guwahati, May 10: A·songni kosako chakatanina champengatako man·gimin ULFA bobil dolko Assam sorkari, tom·tomaona re·bapilna cholko on·gen ine Sombar salo Assam a·dokni gital chief minister Himatna Biswa Sarma parakataha.
“So·sojengjeng ong·atani kamrangko watgale agangrikna re·bachina anga ULFA(I) bobil dolni commander-in-chief Paresh Baruah-ko didienga. Dolgnian tom·tomani bidingo agangrikaniona re·bana nanggen,” ine Assam-ni gital chief minister parakataha.
Dingtang Assam a·songna dabie United Liberation Front of Asom (ULFA) bobil dolko 1979 bilsio bikotahachim aro untalan ia dolni manderang, India a·songni salgro salaram a·dokrango aro Bangladesh a·songni mitam bakrangoba dongnue kamrangko ka·engachim. A·songni kosako chakate ma·manti so·sojengjeng ong·atani kamrangko ka·ahani gimin ia dolko India sorkari, 1990 bilsio champengatskaahachim indiba ULFA dolni commander-in-chief Paresh Baruah-ni dilanichi ia dol, Assam a·dokni dingtang dingtang biaprango so·sojengjeng ong·atani kamrangko ka·engkuachim.
2011 bilsio ULFA-ni chairman Arabinda Rajkhowa-ni dilanichi ia dolni mitam baked sorkari baksa songgigrike tom·tomaniona re·bapilaha indiba Paresh Baruah, ULFA (Independent)-ko bikotskae da·ona kingkingan sorkari baksa agangrikna jechakengkuachim.
