Shillong, Sep 28: Umiam-ni Central Agricultural University (CAU)-ni ning•o donggipa Post Graduate Studies in Agricultural Sciences College-o sakgittamna ong•atenggipa national seminar-ko Budbar salo a•bachengataha aro ia seminar-ko a•bachengatanio Meghalaya a•dokni Chief Minister Conrad K Sangma-na dongpae bakko ra•angaha.
Ia seminar-ko a•bachengate on•anganio a•dokni Chief Minister, jinmana aganprakangengon, ia national seminar-ara a•song gimiko skanggipa changna ong•atenggipa program ong•a indiba ian KVK-rangni kamko mesoke on•gipa program ong•ani gimin namen gamchatgipa ong•a ine parakangaha.
Ia program ba seminar-ara KVK scientist-rangni kamko mittelpilanisan ong•aigija India a•songo aro mongsongbate salgro salaram a•dokrango donggipa KVK-rangni mesoke on•anichi game ge•e cha•enggipa manderangna namgniko ra•bana man•gipa program ong•enga ineba ua aganaha.
Meghalaya sorkari, pangnan game ge•e cha•enggipa manderangni namgnina kamko ka•enga ineba Chief Minister aganaha.
Game ge•e cha•giparangan a•songni gam-jinrang gita ong•a ine janapatengon, game ge•e cha•enggipa manderangni neng•nikanirangko namatna gitaba dingtangmancha chanchie kam ka•aniko nanga ine Sangma aganaha.
Ia seminar-o chanchirimanirangko see rakkienba pilak a•dokrangnan sualatskachina gitaba ua didiangaha.
