Shillong, Dec 21: Manderangni nichake dongenggipa entry/exit point (facilitation centre)-ko Sombar salni bako, Meghalaya a•dokni Deputy Chief Minister Prestone Tynsong, kulie on•angaha.
Ia entry/exit point-ko kulie on•angani ja•man, kobor ra•timgipa manderang baksa agangrikengon, ia apsan dakgipa facilitation centre-rangko bakan a•dokni dingtang dingtang biaprangoba kulignok ine Deputy Chief Minister parakataha.
Meghalaya a•dokona re•baenggipa manderang, badita salna a•doko dongangna miksongenga aro badia biapona re•baenga, uko re•bana skang ba ia entry/exit point-o register ka•ani ja•man songtango gitan dongna man•aigen ineba Tynsong parakataha.
Gipin biaprangoni re•baenggipa manderang maming neng•nikanirangko chagrongna nangjawa ine ku•rachakaniko on•angengon, “Ia biapo technology aro e-device dongani gimin manderang, a•dokona re•bana skangba an•tangtangko register ka•na man•gen aro re•bana skang register ka•na man•jagenchimoba kamrang ta•rakaiani gimin a•dokona sokbaon register ka•na gita bang•e ru•ute sengna nangjawa,” ine Deputy Chief Minister parakataha.
Meghalaya a•doko an•senggipa aro rona rotogipa biaprang dongani gimin Meghalaya a•dokona re•bana sikenggipa manderangko ua mamingna jajrenggijan re•bachina gitaba didiataha.
Ia entry/exit point, jekon Meghalaya a•dokona re•baenggiparangnade facilitation centre ine mingskaengachim, iako da•o sorkari a•bachengate on•na man•ahani gimin ia salko ‘gisik ra•ani’ sal ineba Tynsong parakataha.
“Ian sorkarini chonbee a•bachengatanisan ong•aia aro da•o dipet chingni kamrango chu•onggijanirang dongkunaba gnang. Indiba ia facilitation centre-ko namdapatna gita na•simango maiba agan-ku•pattina nanganirang donggenchimode, chingna agan-ku•pattianirangko on•china chinga mol•molenga. Chinga na•simangni ku•pattianirangko ra•e namdapatna nanganirangko namdapatgen aro gipin biaprangoni re•baenggipa manderangna dongtoangniko on•na gita ia entry point ba facilitation centre-ko namdapatgen,” ine Tynsong aganaha.
Gipin biaprangoni re•baenggipa manderang ia facilitation centre-o an•tangtangko register ka•ani ja•man a•doko naljoke dongangna man•na gitasa sorkari ia facilitation centre-ko kuliaha ineba Deputy Chief Minister parakataha.
Tynsong-ni parakatani gitade, ia biapo facilitation centre-ko kuliani ja•man da•o Bajengdoba aro Ratacherra-oba apsan dakgipa facilitation centre-ko kulignok aro iana a•arangko sorkarina pakwatmanaha.
“Mikkang bilsiode Bajengdoba aro Ratacherra-oba ia apsan dakgipa entry point ba facilitation centre-ko kulina man•gnok ine chinga ka•dongenga aro uni ja•manode Mendipathar railway station-o kuliskagnok. Jagni ba jagittamni ja•manon chinga Mendipathar-oba kulina man•gnok aro uni ja•mande Umroi airport-oba kulignok,” ine Deputy Chief Minister parakataha.
Ia apsan salon Shillong-oni Delhi-ona aro Delhi-oni Shillong-ona sildoreng bilruraanikoba a•bachengatengahani gimin ian gisik ra•na nangani sal ong•chongmotgen ine Tynsong aganaha.
