Shillong, June 27: Upper Shillong-ni Umlyngka-o donggipa Umlyngka Primary Milk Producer Cooperative Society Limited-ni Milk Collection Centre ba dud chimongchakani biapko Sombar salo, Meghalaya a•dokni Chief Minister Conrad K Sangma, a•dokni C&RD Minister Hamletson Dohling-ni dongpaanio kulie on•angaha.
Ia Milk Collection Centre-ko Chief Minister’s Special Rural Development Fund (CMSRDF) aro Special Rural Works Programme (SRWP)-ni ning•o gong lak 37-mang koros ong•e kuliaha aro ia gital building-o dudrangko chikkoke rakkiani aro ia centre-o chimongenggipa dudni nama namgijaniko porikka ra•chakani cholrangba gnang.
Ia Milk Collection Centre-ko kulie on•angani somoio a•dokni Chief Minister, jinmana aganprakangengon, ia centre-ko kulina man•ahani gimin cooperative society-na an•tangni namgipa skaniko parakangenba, a•doko dud badinge cha•enggiparangna sorkarini gita dakchakanirangko on•angkuna ku•rachakangaha.
Meghalaya a•doko metric ton lak 2.5-mangni gita dudrangko nangengon, 50-oni 60 percent-mangni gita dudrang chu•ongjaenga ine janapatengon, ian a•doko dudrangko chu•onga gita on•na dud badinge cha•enggiparangna nambegipa chol ong•enga ine Chief Minister parakataha.
Ia tom•anio a•dokni C&RD Minister Hamletson Dohling-ba jinmana aganprakengon, Umlyngka Primary Milk Producer Cooperative Society-ni gimin talate on•angenba, ia cooperative society batanggimin bilsi 32-na kamko ka•enggipa dol ong•ani gimin gipin cooperative society-rangba ia doloniko skie ra•na man•gen ine parakangaha.
