Shillong, Aug 17: Ri Bhoi a·jao Umsning-oni Jagi-ona dakanggipa ramako tarina gita Budbar salo, Meghalaya a·dokni Chief Minister Conrad K Sangma, pangchakaniko songe on·angaha aro pangchakaniko songe on·anio Cabinet Minister Dasakhiatbha Lamare, MLA Wailadmiki Shylla aro sakgipin MLA Jason Sawkmie Mawlong-ba dongpae bak ra·angaha.

Ia Umsning-Jagi ramara Umsning-oni a·bachenge Assam-Meghalaya simao donggipa Umsiang songo bon·egipa rama ong·a aro ia ramani bakroaniara km 80-mang ong·a.

Ia ramako tarina gita Meghalaya Integrated Transport Project (MITP)-ni ning·o World Bank-ni gita tangka paisarangko dakchake on·enga aro iana gong kror 83-na baten tangka paisarangko chame donmanaha.

Ia ramako tarina gita pangchakaniko songe on·angani somoio a·dokni Chief Minister, jinmana aganprakangengon, ia ramara Ri Bhoi a·jao songdongenggipa manderangni mongsonggipa rama ong·ani gimin ia ramako sorkari, ta·raken matchotate on·na jotton ka·gen ine parakataha.

Meghalaya a·doko rama jal·langrangko namdapatna gita ia sorkari gisik on·e kamko ka·enga aro uandaken a·doko pilak mongsonggipa rama jal·langrangko ia sorkari da·o tariengaha ineba Chief Minister parakataha.

Chief Minister-ni parakatani gitade, ia ramako uni pagipa PA Sangma sagini chief minister ong·engmiting somoiosa tarie on·ahachim aro da·o bilsi 40-ni ja·man ia ramako ua taripiltaie on·na ja·ku de·chakataha.