Lucknow, July 11: Uttar Pradesh a·dokni Lucknow aro dingtang dingtang biaprango Al Qaeda bobil dolni, bomarangko goprete chadrapna miksonganiko police-rang champengsona man·aha ine Robibar salo police-rang u·iataha.

Police-rangni u·iatani gitade, Al Qaeda bobil dol baksa jak donggipa mande sakgni, chong·motan Minhaj Ahmed aro Maseeruddin ba Mushir minggipa manderangko UP a·dokni Anti-Terrorism Squad (ATS) rim·na man·ani ja·man ia bobil dolni kamrangko ma·sina man·aha. Rim·ako man·gipa mande sakgnian Lucknow-o songdonggiprang ong·achim.

“Al Qaeda-ni Ansar Ghazwat-ul-Hind baksa jak donggipa mande sakgniko rim·na man·e dal·bea so·sojengjeng ong·gnioniko chel·chaksona man·aha. Ia manderangoniko sandie sichidarerangko aro bretatna jakkalgipa bosturangko man·aha,” ine UP-ni saksa dal·kalgipa police officer Prashant Kumar parakataha.