Shillong, July 14: Greater Shillong Water Supply Scheme-ni pilak kamko ru·utatanichi korosrang baridapahani gimin, Meghalaya sorkari ia scheme-na tangka gong kror 65 rangko chamdapenga ine PHE minister parakataha.
Iani bidingo, Public Health Engineering (PHE) minister Pa Renikton Lyngdoh Tongkhar-ni Mongolbar salo u·iatangani gitade, giprorogipa sabisini a·sel kamrang namen ja·manchakahaoba re·baenggipa bilsio iako matchotatna gita kang·kare kaenga aro gimagiminko man·rikpilna gita department raken jotton ka·anggen ineba u·iataha.
Jakni kamrang 80% percent-mangni gita matchotahaoba, minggipin ra·bianirang jekai ramarangko cho·e pipe siltongko dapani, private aro defense-ni a·arangko ra·sotna nanganirangoba department pilak neng·nikaniko chagrongkuaha ine agane, iarangoni bang·bata kamkon matchote donmanaha ineba PHE minister talataha.
“Skangni sorkarichi matchotanggijagipa kamrangko da·o rikenggipa sorkari matchotatna nangnikenga aro apsandake, ru·uta bilsirangna matchotchipgijagipa Greater Shillong Water Supply Scheme-ni pilak kamkoba ia sorkari matchotatna gita dingtangmancha gisik on·e project-na nangenggipa gong kror 65 tangkarangkoba chamdapenga aro re·baenggipa bilsiode chinga iako matchotatna man·gen ine ka·dongsoenga,” ine Pa Tongkhar parakataha.
Ia GSWSS Phase III-chi Shillong songjinmani gittimrango donggipa manderangni ringani china neng·nikaniko namatna gita miksongani ong·enga. A·bachengode, ia project-ko ia bilsi June jaon matchotatna manchisoa dongachim. Chu·gimik gong kror 193.50-ni project-ko batanggimin 2008 bilsio ma·mong sorkari ra·chakangaha aro iani pilak kamko matchotatna gita 2011 bilsini May jako somoi donahachim.
Indake ong·engon, bilsi-skurangna kingking matchotatgijagipa Upper Shillong Water Supply Scheme-koba mija Mongolbar salo Pa Tongkhar-ni jakchi oprake on·angaha. Ia scheme-ko batanggimin 2010 bilsion chamatahachim aro pangchakani ro·ongkoba 2010 bilsini July 14 tariko songangaha.
“Chinga ma·sia, ia project-ko batanggimin bilsi 11-rangna skangan matchote on·na gita nangjokchim indiba bang·a a·selrangchi iako matchotatna gita man·chipjaha. Da·alo iako oprake on·ani ja·man, songdonggiparang ia project-ni chu·sokaniko nikna gita man·tokaha,” ine Pa Tongkhar parakataha.
Apsandaken, Upper Shillong Water Supply Scheme-koba nipiltaie kamko ka·angna gita nangaha jenan korosko chammanchaade gong kror 33 rangsanchim, indiba mija bilsi 2020-o iana gong kror 39.95 -ona sorkari gital dake korosrangko chamdapaha.
Ia sorkari, pilak department-rango matchotgija dongenggipa project-ko matchotatna gita nisanko done kamko ka·atenga ine janapatan baksa, minggipin project jekai a·dokni gital Assembly nokko rikatani kamrang matchotengahani giminba Mawkyrwat-ni HSPDP MLA, a·dok sorkariko de·mittele aganangaha.
