Shillong, July 22: Mawlai jolni chadambe dol, Seng Samla Mawlai Pyllun (SSMP)chi su·dodoaniko man·ani ja·man, Meghalaya-ni Urban affairs minister Pa Sniawbhalang Dhar, Shillong songjinma gimikni jeng-jabolrangko galchakenggipa biap Marten-ona Bristibar salo re·bae niechotangaha.
Jabol galram biapona napchakgipako SSMP-ni tekchangani salgipinno Dhar-na minggipin chol dongjae Marten-ona re·bae ua nirokeaniko dakangna gita nangaon ga·akaiaha. Salni bako, minister baksana, chadambe dolni dilgiparang aro Mawlai-ni MLA Pa PT Sawkmie-maangba re·bachapaha.
Iako kobor ra·timgiparangna agananio, ia mamlako chu·gimik jako ra·e aro dingtangmancha gisik on·e kam ka·gnigiparang baksa re·baenggipa August 3 tariko uamang chanchirimna gita tik ka·manaha ine u·iatan baksana, Department-ko man·chape, SSMP-ni dilgiprang baksa ua salon iani gimin nambate chanchigrikanggen aro mikkangchi ja·ku de·atani giminba tik ka·angjolgen ine Pa Dhar parakataha.
Jabolrangko mikkangchi galchakna gita biap gitalko gong·raken sandie tik ka·naba minister uamangna ka·dongataniko on·aha aro iana da·o kamrangko ka·engaha ineba ua agandapangaha.
Marten-o jabol galaniko komiatna gita, minister ong·e mai ja·kurangko de·ataha ine sing·anina, ian uni kam ong·ja, Shillong Municipal Board-ni kamsa ine aganchakangenba, iano uni dakchakaniko uamang nanga ong·ode agangrikna gita ua pangnan kusi ong·gen ineba ua taldapataha.
Indake ong·engon, minister an·tangan a·damona re·bae nirokeani ja·man Marten-ona napchakgipako kulie on·piltaina aro jabol salbagipa trak garirangko napna on·piltaina gita uamang tik ka·angaha ine SSMP-ni padot Samuel Biam koborna aganataha.
