Khanapara, Dec 20: University of Science and Technology Meghalaya (USTM)-ni Chancellor, Mahbubul Hoque baksana a·songni aro a·songgipinoni niksenggipa manderang gimikni dongpaanio, Ri-Bhoi a·jani Khanapara, 9th Mile-o donggipa USTM-o soka-chakenggipa chang 47-gipa All India Sociological Conference ba tom·bimonganiko Mongolbar salo, Assam-ni Governor, Prof Jagdish Mukhi do·ga oe on·angaha.
“Hundred Years of Sociology in India: Exploring Trajectories for the Future” ine pangchakaniko done, USTM-o ia jani 20 oni 22 tarikona Indian Sociological Society-ni ong·atenggipa conference-o, India a·songni dingtang dingtang university-rang aro college-rangni sociologist-rang sak 1200 mangna baten bakko ra·tokenga.
Ia tom·bimanganio bakko ra·e Assam-ni Governor Prof Jagdish Mukhi, jinmana aganprakatengon, a·songni chonbegipa university-ni iandakgipa dal·bea tom·bimonganiko salgro-salaram a·jolo skanggipa changna ong·ataniara USTM-na namen rasong chabeani ong·chongmota ine aganangenba, India-ni salgro-salaram joloni chatro-chatrirangna nambatgipa gadangrango lekka-porako on·anio USTM, ge·sa namen chu·sokenggipa institution ong·a ineba parakataha.
USTM-ko chalaienggipani kamko de·mittele aganangengon, India a·songni socio-economic-ko tang·doatna gita manderangko bimang ong·ate a·gilsak gimik baksa kamko ka·na man·na gita niksamsoani gnang university-ni Chancellor, Mahbubul Hoque, chatrorangna namgipa cholrangko on·enga ineba Assam-ni Governor aganangkuaha.
Tom·bimonganiko do·ga oe on·anganio, Bhopal-ni Prof. I. S. Chauhan aro Mysuru-ni Prof. R. Indira-maangna lifetime achievement award-rangko uamangni jako pakwatanga baksanaba, “Gender, Law and Social Transformation in India” -ni gimin segipa ki·tap gitalkoba Assam-ni Governor-ni jakchi oprake on·angjolaha.
Una agre, ia tom·bimaonganio bakko ra·gipa gipin niksenggipa manderangoni, New Delhi, Jawaharlal Nehru University-ni Padma Bhushan award-ko man·gipa Prof. Emeritus T. K. Oommen, “On the Foibles of Indian Sociology: Suggestions Towards their Rectification” -ni bidingo mongsonggipa kattarangako tom·bagiparangna aganangaha. “Hundred Years of Sociology in India: Mapping the Trajectory”-ni gimin a·songni President-ni agangipako, Indian Sociological Society-ni padot aro Jammu University-ni Sociology-ni professor, Prof. Abha Chauhan aganangskaaha. Uandake, USTM-ni Vice Chancellor, Prof G D Sharma-ba salni bako tom·bagipa jinmani mikkango aganprakangaha.
