New Delhi, April 14: Uttar Pradesh a•dokni Chief Minister Yogi Adityanath-ko Budbar salo, COVID-19-na porikka ra•e nianio positive ong•aha aro positive ong•ani ja•man ua an•tangan noko dingtang nape dongengaha ine u•iataha.
Iani bidingo koborko parakatna skang, CM Yogi Adityanath-ni office-o kam ka•enggipa mitam official-rangba COVID-19-na porikka ra•anio positive ong•ahani gimin ua an•tangba dingtang nape dongengahachim.
Batanggimin adita salrangni gisepo uko grongegipa aro unbaksa apsan kam ka•rimgipa manderangkoba porikka ra•e nichina gita Uttar Pradesh-ni Chief Minister didiataha.
Re•anggipa April-ni 5 tarikon Uttar Pradesh a•dokni Chief Minister Yogi Adityanath, COVID-19 tikani skanggipa samko Lucknow-ni Civil Hospital-o su•e ra•ahachim ine nikna man•a.
