Guwahati, Dec 2: Uttarkashi-ni Silkyara rong•kol ramao a•a rudapenba jachange donggipa sak 41 kam ka•e cha•giparang baksa Assam-ni sakgni kam ka•e cha•giparangko jokatani jamano, uamang Assam-ni Kokrajhar-ona naljoke sokangaha. Uamangko adita somoirangna ru•utbee jotton ka•ani jamano Mongolbar walo jokatna gita man•aha.

Ia kam ka•e cha•enggipa sakgni manderangara, Kokrajhar-ni Ramfalbil songoni, bilsi 40 ong•gipa Ram Prasad Narzary aro bilsi 35 ong•gipa Sanjay Basumatary ong•achim.

Indake, Narzary aro Basumatary sakgnini nokdangni manderang, uamangni sal 16-na kingking Silkyara rong•kol ramao jachange dongaoni noktangona naljoke sokbapilanina namen kusi ong•tokaha.

“Rong•kolo jachange dongengmitingo chinga name jajrengahachim indiba chingni obostako ripengskarangna u•iatahaon, chingna oxygen, chi aro cha•anirangko Chu•unga gitan chingna dakchakaniko on•aha. Da•o noktangona naljoke aro tom•tome sokbapilna man•ahanina, dakchakgipa sakantikon aro Isolko mitela” ine jokatako man•giparangoni Ram Prasad Narzary aganangaha.

Uandaken, Sanjay Basumatary-ba , uamangni chagronggimin obostako talate on•angaha aro uamangko jokatanina kamko ka•anggipa dolrangko mitelpilskaaniko dakangaha.

Iakoba poraie nina man·gen: Chang 5-gipa Megh Games-ko Tura-o ong•atna tarisamsoaniko Sports & Youth Affairs Director nirokanga