Ampati, Apr 13: A•chikrangni dul doke koborrangko jinmana u•iatrongbaenga gita, voter-rang an•tangtangni man•gimin bilrangko jakkale pu•onanio bak ra•ani gimin u•iataniko on•a, Ampati-ni anti cha•chakram biapo, “Dul Doka” program-ko, Sonibar salo ong•atangaha.

“Dul Doka “program-o, bang•a chadamberang aro bregimin pu•ona man•gipa manderang aro bi•sarangba re•bae bak ra•paaha.

Program-ko, Lok Sabha Election-na, Systematic Voters Education and Electoral Participation (SVEEP) campaign-ni bak dake, Meghalaya CEO baksana South West Garo Hills-ni District Administration aro A•chik Theatre, Tura nangrimenba ong•atangaha.

South West Garo Hills a•jani Deputy Commissioner aro District Election Officer, Hema Nayak, mongsonggipa sokgipa ong•enba, program-ona tom•baenggipa manderang baksa agan golpogrikaniko dakangaha aro April 19 pu•onani tariko, sakantian ong•kattoke an•tangtangni bilko jakkale pu•onchinaba, ua manderangko didiataha.

Indake, darang voter-koba watchangjana gita, bregimin aro be•enni neng•nikaniko man•enggipa manderang jemangan pu•onchakram biapona re•bae pu•onna man•jaengachim, uamangna noko donge pu•onani cholrangko on•enga aro jemangan rama re•anio neng•nikaniko man•enga, uamangnaba wheelchair-rangko on•aniko dakenga ine ua talatangaha.

Batanggimin eleksinrango bang•a manderangni pu•onaniko nikna man•ahani gimin, ia changni eleksinoba, man•a dipet, 100 % ko man•a jotton ka•china inenba ua sakantikon didiataha.

Ampati Degree College-ni Principal, Dr. Mamunur R. M. Willy-ba pu•onani gamchatani gimin jinmana aganprakengon, “an•chingni jako maming bil dongjaoba an•chingo pu•onani bil donga” ine aganaha. Unbaksana, ia pu•onani salo chutti man•enganiara noko nape kusi ong•e cha•e ringe asonge rona on•enga ong•ja indiba re•ange pu•onasa ine aganan baksa, je cholrangko Election Authority-rang on•engachim, uarangko mande ra•e ra•chakna nanga aro ia a•songo songdong a•chaenggipa ong•e uamangni dakna nanggni kamrangko chu•sokatna on•a nanga ineba ua agandapataha.

Ampati Govt. Higher Secondary School-ni Principal, Jilpash R. Marak-ba, pu•onani tariko ong•katbae an•tangtangni man•gimin bilrangko jakkale an•tangtangni namnikbatgipa dilgipako seokchina inenba kan•dike talate on•angaha.

Ia program-ni bak gita, eleksinni bidingo segimin lekka paltakrangkoba bak ra•gipa sakantinan sualataha.

Na·simang ia video-koba nina man·gen:

Na·simang iakoba poraina man·gen: AASU Rongali Bihu-ko gisik ra•ana Mukoli Bihu Utsav-ko mania

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter-twitter.com/nemediahub

Youtube channel- www.youtube.com/@NortheastMediaHub2020