Guwahati, May 17: COVID-19 man•gipa manderangkoba hospital-rango nambate nirok sandina man•na gita pilak doctor-rangkon walni somoirangoba kamtangtangko ka•china Assam-ni Chief Minister Himanta Biswa Sarma ge•etangaha.
Sarma an•tangan Robibar pringwalni 2:30 bajimango Gauhati Medical College & Hospital (GMCH)-ona re•ange nienba, doctor-rangko je somoioba kamtangtangko ka•china ge•etangaha ine kobor on•timgiparang u•iataha.
Assam a•dokni pilak medical college-rangon walni somoirangoba sanna bananirangko on•china sorkari nangnikenga ine janapatengon, COVID man•gipa manderangko sanna gita kamrangko ka•engani gimin Assam-ni Chief Minister, an•tangni chu•ongnikaniko parakatenba, salo konta 24-na dangdike on•enggipa pilak doctor-rang, nurse-rang aro gipin kam ka•giparangko mittelpilangaha.
GMCH-ona re•angani somoio ua hospital-o kuligipa oxygen plant-koba niangjolaha.
Assam a•doko COVID-19 man•giparangni gimin janapatengon, Guwahati songjinmani adita biaprango COVID man•giparang komiangengoba, sabisina mikrake donganiko Assam sorkari maming dakeba komiatkujawa ine Chief Minister parakataha.
Sarma-ni parakatani gitade, Assam a•doko COVID-19 man•giparangko nambate nirok sandina man•na gita Sarusajai-o kulienggipa COVID-19 hospital-oba ge 300 palangrangko donatna sienga.
Indake ong•engon, salni bakoba Assam-ni Chief Minister, video conference gita pilak a•jani deputy commissioner aro SP-rang baksa tom•aniko ong•atangenba, COVID-19-ni giproroaniko champengna aro dingtang dingtang niamrangko ra•gatani bidingo chanchirimangaha.
“Da•alonin district hospital-rangko nirokjringchina aro walni somoirangoba COVID-19 man•giparangko nirok sandichina anga DC-rangko ge•etangaha,” ine Assam-ni Chief Minister, social media-o parakataha.
Tika su•chakgipa centre-rangko nirokna gita a•ja ge•prakon additional deputy commissioner sakprakko donatchina gitaba ua ge•etangaha.
