Williamnagar, Oct 29: Williamnagar District Sports Association (WDSA)ni ong·atenggipa MLA Football Trophy 2021-ko, a·jani Additional Deputy Commissioner Pa L.M. Sangma, Meghalaya NPP-ni General Secretary Pa Georgemon S. Marak aro gipin official aro school-ni principal-rang gimikni dongpaanio joltangni MLA aro Meghalaya sorkarini Chief Whip Pa Marcuise N. Marak-ni jakchi Sukrobar salo oprake on·angaha.
Kal·aniko a·bachengna skang, Williamnagar District Sports Association-ni padot, sakantikon rimchaksoa baksa ia susaaniko ong·atna tangka-paisachi dakchakanina joltangni MLA Pa Marcuise N. Marak-ko dingtangmancha mittelpilangaha.
Kal·susaaniko oprakani somoio mongsonggipa sokgiparangoni, Williamnagar-ni ADC Pa L.M. Sangma, chadambe sakantian an·tangtangni changa-sapao pangchake jekoba dakna nanga aro da·oni chasongo sports ba kal·susaaniko dal·e ra⋅e iakon janggi tangani cholnaba basena nanga ine didiani kattarangko aganangaha.
Indake, tom·ao mongsonggipa ong·e sokgipa Pa Marcuise N. Marak, kal·giparangko name aro niamo pangchake kal·china didiangan baksa, robol ga⋅tinganiko janggi tangani mingsa chol gita ra⋅e mikkangchiba kal·angchina gita pilak kal·giparangko didiangskaaha.
Ua somoio Williamnagar Ferando Memorial School-ni ge·sa Band Party, Boney-M-ni mingsinggipa git “By the rivers of Babylon” aro A·songko ring·mittelani git National Anthem-koba doka-damangaha.
Unomiting, MLA Football Trophy 2021-na skanggipa robol ga·tingsusaaniko Rongsak Champion aro Rangmalbadim Champion-ni gisepgriko kal⋅angaha, jeon dolgnian golprakprak chipgrike bilgrik ong·aiaha.
Indake ong·engon, ia robol ga·tingsusaaniko ong·atani miksonganiko Williamnagar District Sports Association-ni padot Pa Joyson K. Marak-o Hub News-ni sing·anganina, Williamnagar jolni chadamberangko robol kal·anio gisik nangate uamangko ra⋅dona aro kal·giparangko basee nambatgipa gadangona ra⋅doangna miksonganio iako ong⋅atenga ine parakataha.
