Tura, Sept 26: Gittimni manderangna nanggipa sana-banani cholrangko on·na gita, A·chik Heritage Pursuits (AHP)ni a·bachengatgipa Tura Christian Hospital-ni Community Health Nursing Centre-ko West Garo Hills district-ni Sakal A·duma songo rikna gita pangchakani ro·ongko songangaha.
Ia Community Health Nursing Centre-ko rikchakatna gita salni bako mongsonggipa ong·e sokgipa GBC-ni general secretary Rev. Janang R. Sangma-ni jakchi pangchakani ro·ongko songe on·angaha.
Tom·anio, Tura Christian Hospital-ni Associate Medical Superintendent Dr. Editha W. Momin, Medical Superintendent Dr. Jedidah N. Marak, Tura Christian Hospital-ni ADMC chairman Dr. CB Sangma aro a·nokgipa aro a·ako on·gile dakchakgipa Pa Poljonsing M. Sangma aro uni nokdangni manderang aro gipinrangba dongpae bakko ra·angtokaha.
Indake ong·engon, ia Community Health Nursing Centre, mikkangchi ua songo donggipa manderangna nanggipa sana-banani aro nirokatani cholrangko on·angan baksana iachi, uni wilwilao aro samtangtango donggipa gipin songrang jekai Daribokgre, Baladinggre, Sakalgre, Sasatgre, Chandigre ba ugitarang, je songoni manderangan sambajol hospital-ona mangmangba km 20-rangko re·bana nangrongachim uamangnaba mikkangchide bang·a namgniko on·gen.
