Shillong, June 11: West Jaintia Hills a·jaoba COVID-19-ko man·giparang batrorobaengani sorkari jajrengsona a·bachengaha aro uandaken da·o dipet West Jaintia Hills a·jao chu·gimik lockdown-ko ra·gatani bidingo Chief Minister parakatjahaoba, COVID man·giparang batrorobaengani gimin rakgipa niamrangko ra·gatskana nangkuenga ine aganaha.
West Jaintia Hills a·jao da·o COVID man·ani 33 percent-ona tang·doangaha aro da·o dipet
Meghalaya a·doko man·batgipa ong·skaengaha.
East Khasi Hills a·jaoba COVID man·giparang komijaengoba COVID man·anide 19 percent ong·skaenga.
Meghalaya a·dok gimiko COVID man·aniara 12.9% ong·skaenga.
“West Jaintia Hills a·jao positivity rate da·o 33 percent-ona gadoangahani gimin rakgipa niamrangko ra·gatangkuchina Cabinet ku·pattiangaha. West Jaintia Hills a·jani positivity rate da·o a·dok gimikni rate-na changgittam batengaha aro ian sorkarina namen jajrengna nangani ong·enga,” ine Sukrobar salo a·dokni Chief Minister parakataha.
East Jaintia Hills aro West Jaintia Hills a·jarango COVID-19-ko warachakna tarisamsoanirangko nina gita ua Sukrobar salo Jowai-ona re·angenba a·ja damgnini official-rang baksa tom·e chanchirimangaha. Jaintia Hills-o aro mongsongbate West Jaintia Hills a·jao obostarang namjabatangjana gita rakgipa niamrangko ra·gatna aro ja·rikangna nanggen ine Chief Minister aganaha.
East aro West Jaintia Hills a·jarango COVID-ko warachakna tarisamsoanirangko health official-rangni report on·aniko ua chu·ongnikaha ineba Chief Minister parakataha.
Indake ong·engon, maming tangka paisa gri indin on·enggipa COVID-ni tikako su·e ra·echina gitaba a·dokni Chief Minister, a·doko songdongenggipa manderangko mol·molattaiaha.
Da·o dipet Meghalaya a·doko chu·onga gitan tikarang dongenga aro Sukrobar salmangmangon bilsi 18-oni bilsi 44 ong·gipa manderangna pong 8000 tikarangko su·aha ine Chief Minister parakataha.
COVID-ni tika ponggniko su·mangimin manderangde da·o naljoke dongtokengaha aro da·o dipet maming a·sel ong·anirangko knasona man·kujaenga ineba Chief Minister parakataha.
