Jowai, Dec 10: Sukrobar salo, Meghalaya a•dokni Education Minister aro Amlarem-ni MLA Lahkmen Rymbui, West Jaintia Hills a•jani Mupyut-o tom•aniko ong•atanio Shkenpyrsit RMSA Secondary School, Madantrypait Govt LP School aro Mupyut Govt LP School-ni gital nokko rikna pangchakaniko songe on•angan baksana Mupyut Water Supply Scheme-naba pangchakaniko songe on•angaha.
Ia tom•aniko ong•atanio Additional Chief Secretary DP Wahlang, Education Department-ni Director Ambrose Ch Marak, PHE-ni Chief Engineer CR Challam aro gipin official-rangba dongpae bak ra•angaha.
Mupyut Water Supply Scheme-ko rikna gita gong kror 7.46 tangkarangko chamanaha aro ia water supply scheme-ko jadokni gisepon matchotna ka•dongengani gimin ian Mupyut songni ning•o donggipa te 412 nokdangrangna Functional Household Tap Connection (FHTC) ba chi pipe-rangko sokate on•na dakchakani ong•gnok.
Indake ong•engon, Shkenpyrsit RMSA skulni gital nokko rikna gong 1,27,68,000-ko, Madantyrpait Govt LP School-na gong lak 37-ko aro Mupyut Govt LP School-na gong lak 37 tangkarangko chame donskaenga aro ia skul nokrangko 2022 bilsini October jao matchotna ka•dongskaenga ine kobor on•aha.
Ia tom•anio a•dokni Additional Chief Secretary DP Wahlang, jinmana aganprakengon, uni bilsi 30-na kam ka•anio ian skanggipa changna tom•a changsanon dambri pangchakanirangko songe on•ani ong•enga ine parakangaha.
Pangchakanirangko songe on•anganio a•dokni Education Minister Lahkmen Rymbui jinmana aganprakangengon, ia mingbri project-rangkon 2022 bilsini October jani gisepon matchotatna gita sorkari aro nangchakegipa department-rang kam ka•gen ine ku•rachakangenba, ia project-rangara ia songrango donggipa manderangni ru•uta bilsirangna nikenggipa jumangrangan ong•achim ine parakangaha.
A•dokni Chief Minister Conrad Sangma-ni dilanichi ia sorkari, pilakni gitan dingtanganiko a•dokna ra•bana man•aha ineba ua parakataha.
