Tura, May 6: Bristibar salo Meghalaya a•dokni Chief Minister Conrad K Sangma, Tura-ona re•baenba, West Garo Hills a•jao COVID-ni obostarangko nipilna gita West Garo Hills a•jani deputy commissioner Ram Singh aro health department-ni official-rang baksa tom•aniko ong•atangaha.
Ia tom•anio a•dokni Chief Minister, tom•anio bak ra•giparangna aganprakengon, COVID-ni giproroaniko champengna gita tarie dongchina pilak officer-rangko didiangaha.
Ia tom•anio health official-rang baksana dingtang dingtang toromni dilgiparang aro dingtang dingtang dolrangba dongpae bak ra•angaha aro uamangkoba ua, COVID-ko warachakna gita tikarangko su•e ra•na nangani bidingo gipinrangna agane on•skachina gita didiangaha.
Mitapgnigipa mask-rangko gane, jakrangko rongtalatjringe aro mande jinmaoni chel•e donge COVID-ko warachakna dongimin dingtang dingtang niamrangko ja•rikchina gitaba ia tom•anio a•dokni Chief Minister, manderangko didiangaha.
Circuit house-o tom•a matchotani ja•man a•dokni Chief Minister,Tura-ni Maternity & Child Hospital, Tura Civil Hospital, SMELC Corona Care Centre aro uandakgipa biaprangkoba niangjolaha.
Maternity & Child Hospital-o ua gital kuligipa ICU ward-ko oprake on•angaha aro Tura Civil Hospital-oba gital Oxygen Generation Plant-ko ua niangaha.
Bilongbate saenggipa manderangko sanchakna gita Tura Civil Hospital-o kulienggipa biapkoba a•dokni Chief Minister niangjolaha.
