Tura, May 5: West Garo Hills a•jaoba ta•raken COVID-19 giprorobaengahani gimin manderangni nangchongmotan somoirango oxygen-rangko on•na man•na gita hospital-rango dongkuenggipa oxygen-rangko nipilna gita Budbar salo West Garo Hills a•jani Deputy Commissioner Ram Singh, district level monitoring committee-ni tom•aniko ong•atangaha.
Tom•a matchotani ja•mano Deputy Commissioner-ni internet gita parakatani gitade, da•o dipet oxygen-rangko Tura Civil Hospital, Tura-ni Maternity & Child Hospital, Holy Cross Hospital aro Tura Christian Hospital-rango man•engkua.
District Medical & Health Office baksana dingtang dingtang CHC aro PHC-rangoba medical oxygen-rangko nanggitikan somoirangona chimonge donenga ineba West Garo Hills a•jani Deputy Commissioner parakataha.
Deputy Commissioner-ni parakatani gitade, West Garo Hills a•jao da•o dipet ge 1000-na baten oxygen cylinder-rang donga.
“Oxygen-rangko Assam a•dokni Bongaigaon-o chipe ra•baenga. Holy Cross-oba Oxygen plant damsa, MCH-o Oxygen Concentrator damsa aro Tura Civil Hospital-oba Oxygen plant damsako chinga a•bachengatenga aro iana kamrangko da•o ka•engaha,” ine Deputy Commissioner, social media-o parakataha.
West Garo Hills a•jani Baljek-oba bakan Medical Oxygen-na Cryogenic Plant-ko kulina siengahachim.
Deputy Commissioner-ni u•iatani gitade, da•o dipet ia hospital-rango ge 6-oni ge 8 cylinder-rangko jakkalna nangenga.
