Williamnagar, Sept 16: An·chiko nange sagiparangna mingsachi dakchakani cholko on·ani gita, Williamnagar Civil Hospital Blood Donation Centre aro Loyola College-ni National Service Scheme-ni ning·o donggipa chatro-chatrirang nanggrime, sakantina mikrakataniko aro an·chi on·chakani program-ko Sukrobar salo Loyola College-o ong·atangaha.
Ia an·chi on·chakani programo, Loyola College-ni sak ritcha batpile chatro-chatrirang an·tangtangko on·kanga gnang an·chitangko kusi ong·e on·gilna gita sokbatokahachim, indiba somoirang chu·ongjani a·sel sak 45 chatrorangsan on·na man·tokaiaha.
Programo, Williamnagar Blood Donation Centre-ni Dr. Jimmy Carter Ch. Marak aro uni dol, an·chi on·chakanina dongimin niamrangni gimin chatrorangna talate on·ani ja·man uamang an·chi on·chakna man·gen ba man·jawa porikka ka·e nienba joljol an·chi on·gilaniko dakangaha.
Iani bidingo Loyola College-ni skigipa saksa aro Loyola College NSS-ni Program Officer Witseng Ch. Marak-ni HubNews-na parakatani gita, “Tura aro Williamnagar jillao blood bank-rang dongenchimoba, da·ororo an·chi nangnike phone ka·arangko aro social media-o kobor on·anirangko niksona man·enga, uni gimin an·chirangko on·gilachi an·chiko nange saenggipa manderangna dakchakna gita miksongesa ia Blood Donation Camp ba an·chi on·chakani programko ong·ataha.
Unomiting, programo an·chitangko on·gilani ja·man bang·a chatro-chatrirangan an·tangtangni kusi ong·aniko janape, mikkangchiba uamang apsandake an·chitangko on·gilangkugen ine paraktokaha.
