Williamnagar, May 27: East Garo Hills District ni ning•ao donggipa ge•sa niksenggipa aro nambatgipa school, jekon Jesuit dolrang 1993 bilsio a•bachengate jolni bisarangna skia-poramangmangkosan ong•aigija, gipin skianirang jekai kal•susaani, git ring•ani aro tamasa dakani aro ugita bang•a skie on•anirangko on•gilpaenggipa ong•a. Ua school-ona dakanggipa rama namen namjabeaha aro skul bi•sarang iani a•sel namen neng•nikaniko chagrongna nangrongenga. Uni gimin skulo poraienggipa chatro-chatrirangni ma•a-paarang ku•mongrime, an•tangtangan tangka-paisarangko gile ua ramako May jani 27 tarik sukrobar salo jinma ka•grime on•aha.
Ua skulo poraienggipa bi•sa saksani ma•gipa jean ia ramako tariana chanchidilgipa ong•achim, uni Hub News na parakatanigita de, ia rama namen namjabeahani a•selo adita a•sel ong•anirangba dongaha. Ia rama on•tisa a•ding dona nanggipa ong•ani gimin bi•sarangko gario salruraanioba neng•nikaniko man•enga. Ia pilak neng•nikanirangko nike chinga an•tangtangan chanchigrike, tangka-paisa gileba-kem•eba iako tarie on•a nangaona sokaha ine u•iataha.
Ia ramako taridapanio poraienggipa ma•a-paarangmangmangsan bak ong•aija. Iako taridapanina tangka-paisachi, bilchi-jakchi on•gilgiparang aditan gnang. Uamangoni mitamrang jekai Charak D Sangma, East Garo Hillsni GSU padot Saljrang Tengrik R Marak, Loyola skulni principal Fr. Robert aro gipinrang ong•a. Uamang sakprakprakkon gisik ka•tongoni mittelbea ine pagipa saksa mittelpilatskaaha.
Pagiparangoni saksa jean an•tangni bimingko aro mikkangko mesokataniko nangnikja, ua bonkame John F Kennedy ni katta “Nang•ni a•song nang•na maiko dakna man•gen uko sing•nabe, indiba na•a nang•ni a•songna maiko dakna mangen ukosa sing•bo” ine aganataha. Beben ia magipa-pagiparangni kamrang songsalna ka•saaniko mesokani kam ong•a aro uamangko sakantian mitelchongmotna kraa.
