Williamnagar, Sept 6: Sajinma ni a⋅sel Teachers’ Day ko dal⋅e manina man·jagenchimoba East Garo Hills ni skotong songjinma Williamnagaro chang sotdokgipa Teachers’ Day ko Sept. 6 tariko DRDA Hall No. sa-o maniangskaaha. Ia manianiko District School Education Officer Pa Ricky D. Shira dakdilangaha aro ia tom⋅aniona Acting Deputy Commissioner Pa L. Ch. Marak monsonggipa sokgipa ong⋅skaaha.
Tom⋅anio Educere School ni Headmistress Ma Gamchi Timre R. Marak India a⋅songni President ni Teacher’s Day-o agangipa kattarangko janapjole dongpagipa sakanti skigiparangna didiani kattarangko aganaha. Sakanti poraigipa bi·sarangni bil gnangani aro changa-sapanirang dingtanggrika ine talatangengon, bi·sarangni gisiko sikanirang aro uamangni dingtang dingtang dakgipa nangnikanirangko ma·sichakgipa ong·e gimik dakgipaon uamangko dal·roroatani gimin skigiparang dingtangmancha gisikko on·na gita nanga aro “Skulo poraigipa bi·satangtangni poraianirangna gisikko on·batnaian sakanti skigiparangni daito ong·a ine janapatan baksa, gisik gnanggipa skigiparang, uamangni bewalchi, dakdilanichi aro skie on·anichi uamangni chatro chatri rangko mikkangchi chu·sokgipa ong·atna man·a,” ine aganaha.
Ia Teacher’s Day-ko manianio sak 5 skigiparangna District ni gadango donsogimin boksis rangko mongsonggipa sokgipani jakchi on⋅angaha. Boksis ko man·gipa Skigiparangara:
Rongrenggre Govt. Higher Secondary School ni skigipa Ma Eldrina Ch. Momin.
Upper Primary gadango Skigipa Nongchram Deficit School ni Pa Sishir Kr. Chatterjee.
Rongap Songgital Lower Primary School ni Head Teacher Pa Sengdan R. Marak aro dingtang manchagipa boksisko Green Yard Secondary School ni Scout Master Standson S. Sangma aro Rongjeng Holy Familyni Guide Teacher Amelia Ch. Marak mangna on·angskaaha.
Boksis man·giparangoni saksa Ma Eldrina Ch. Momin pilak skigiparangko gisko nange namgipa skianirangko chatro-chatri rangna on⋅na aro nam⋅a dakmesokanirangko me⋅sokna ine jinmako ku⋅mongangaha.
Mongsonggipa sokgipa Pa L.Ch. Marak jinmana aganengon skigiparangan pilak ramako mesokgipa ong⋅a aro chadamberangni dakbewal rikbewal-ko tarigiparang ong⋅a uni gimin uamangni kamrangko an⋅ching mamung dakeba tona manja ine parake skigiparangko mitele uamangko mikkangchiba nambate dangdike on⋅angchina didiangaha.
