Shillong, Jan 10: Sukrobar salo, West Jaintia Hills a•jao donggipa Chutwakhu gittimni bilsi 100 gapaniko manianio, Meghalaya a•dokni Chief Minister Conrad K Sangma-ba dongpae bak ra•angaha aro ia manianiko ua an•tangan oprake on•angaha. Ia manianio a•dokni Deputy Chief Minister Sniawbhalang Dhar, MLA Wailadmiki Shylla aro sakgipin MLA Lahkmen Rymbui-ba dongpae bak ra•angtokaha.
Ia tom•bimonganio a•dokni Chief Minister, jinmana aganprakangengon, Chutwakhu gittimni bilsi 100 gapahanina an•tangni namgipa skanirangko on•angenba, Chutwakhu gittimni namroro silroroanina bang•en on•gilahani gimin gittimni gitcham dilgiparangko mittelpilangaha.
1931 bilsirangonin Chutwakhu gittimni dilgiparang, me•chikrangko songsalni namgnina kamrangko ka•dilchina gita didigiparang ong•aha ine janapatengon, 1934 bilsimangonin ia gittimo chadambe dolrangnaba biapko on•e da•o me•a, me•chik aro chadamberangni bakrime kamrangko ka•anichi namroro silroroaniko ra•bana man•aha ine Chief Minister aganaha.
Gittimo songdongenggipa manderangni gamchatgipa ong•ani bidingo janapatengon, Meghalaya-ni bilara a•dokni dingtang dingtang gittimrangon pangchaka ine dingtang dingtang a•jarango aro a•doko pilakni gitan namroro silroroaniko ra•bana man•na gita ua, gittimni manderangko, sorkari baksa bakrime kam ka•china didiangaha.
Jowai-o Meghalaya Games-ko sokachakna gita tarisamsoanirangko nikeba ua an•tangni kusi ong•aniko parakataha aro ian West Jaintia Hills a•jana gisik ra•beani somoi ong•enga ine parakataha.
Kal•susaanirango sorkarini koros ka•aniara koros ka•mangmanganisan ong•jaenga indiba ian a•dokni chadamberangna aro a•dokni mikkangchina koros ka•anisa ong•enga ineba Chief Minister aganaha.
Meghalaya Games-ko sokachakanio kamrangko ka•samsona gita ia tom•bimonganio a•dokni Chief Minister, West Jaintia Hills a•ja gimikni dol 21 sports club aro association-rangna gimik gong lak 21-ni cheque-rangkoba suale on•angjolaha.
Ia tom•bimonganio a•dokni Deputy CM Sniawbhalang Dhar-ba jinmana aganprakengon, Chutwakhu gittimni bilsi 100 gapaniko manianiara, ia gittimni pagitchamrang aro gitcham dilgiparangni on•kange kam ka•aniko mesokani ong•aha ine parakataha.
Ia chang Meghalaya Games-ko Jaintia Hills-ona ra•baengani gimin ua dingtangmancha Chief Minister-koba mittelpilangaha.
Na·simang ia video-koba nina man·gen:
Na·simang iakoba poraina man·gen: Political party-rang sorkariko matnangana bate an•tangtangni niksamsoanikosa mesokna nanga: Rakkam
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
