Nongstoin, March 14: Batanggimin somoio West Khasi Hills a·jao saksa dambe me·chik bi·sako kragija dake til·ek-an·chaani mamlao saksa Agustine Momin-ko bilsi 25-rangna pattoko chipchina gita Nongstoin-ni Court of the Special Judge (POCSO) raiko on·angaha.

Re·anggipa anti Mongolbar salo, Nongstoin kachario ia mamlako bichalanganio Rajesh G Momin ine mingklakgipa Agustine Momin-ko dosi on·angenba, chu·gimik bilsi 25-rangna pattoko chipchina gita raiko on·angan baksa gong hajal 30000 tangkarangkoba dai gamchina gita hukumko on·angaha.

Kacharini dosi on·ako man·gipa mande, batanggimin 2020 bilsini June 31 tariko West Khasi Hills a·jani Dalbot C songo saksa dambe me·chik bi·sako drae til·ekahachim aro ia ong·a obostani kosako POCSO Act-ni section 5(m)/6-ni ning·o Shallang Police Station-o mamlako segatangaha. Uandake, police officerrang aro staff-rang gisiko nange sandiatenba dos dakgipa mandeko gong·raken rim·a gita man·aha ine West Khasi Hills, Nongstoin-ni SP koborna u·iataha.