Shillong, June 7: West Khasi Hills a·jao bi·sa sak 15-ko mande saksani kragija dake kal·akani gimin State Commission for Protection of Child Rights (SCPCR) raken jegalataha.
Ia obosta ong·ani West Khasi Hills a·jani Umsaw Tyllang songo ong·ahachim aro ia a·selni bidingo bilsi 10 ong·gipa me·a bi·sako kragija dake kal·akani ja·mansa ma·sina gita man·ahachim.
Ia sak 15 bi·sarangko kragija dake kal·akani gimin jegalatengon, ia a·selni bidingo talbate ma·sie ra·na gita district protection officer-rang, police-rang baksa Umsaw Tyllang songona re·angaha ine Mongolbar salo, SCPCR-ni chairperson Iamonlang Syiem parakataha.
Ua an·tangba commission-ni gipin membor-rang baksa ia songona mikkang antirang re·angnaba gnang ine Syiem parakataha.
SCPCR chairperson-ni parakatani gitade, ia a·selni bidingo ua songni sordar baksa agangrikon, dos dakgipa mande, ia bi·sarangko 2017 bilsimangonin kragija dake kal·akahakon ine sordar una parakataha.
Ia sak 15 bi·sarangna agreba gipin bi·sarangba dongkuengnaba gnang ine an·tangni chanchichipenganiko parakatengon, iani bidingo talbate ma·sie ra·na gita commission da·o am·sandianirangko dakengaha ine Syiem parakataha.
