Williamnagar, Oct 13: Budbar salo, Meghalaya a•dokni Chief Minister Conrad K Sangma, Williamnagar Municipal Board (WMB)-ni office nokko rikna gita pangchakaniko songe on•angaha aro ia pangchakaniko songe on•angani somoio Williamnagar-ni MLA aro a•dok sorkarini Chief Whip Marcuise N Marak-ba dongpae bak ra•angaha.
WMB-ni ia gital office aro market complex-ko Williamnagar-ni Soil Bazar-o rikna sienga.
Ia office nokko rikna gita pangchakaniko songe on•angani somoio a•dokni Chief Minister, jinmana aganprakangengon, ru•uta somoirangonin manderangni nangnikengani gita da•o Williamnagar Municipal Board-ni gital office-ko rikna man•engaha ine an•tangni kusi ong•aniko parakangaha.
Ia nokko rikanio tangka paisarangko simsake jakkalchina aro kamko kakketo ka•china gita ua ia nokko rikenggipa contractor-koba didiangaha.
Ia nokko rikmanahaode bading chiwale cha•enggiparangnasan ong•aigija chadamberangna aro dingtang dingtang self help group-rangnaba bading chiwalani kamrangko ka•na chol ong•gnok ineba Chief Minister aganaha.
Ia nokko rikna man•na gita krenge kamko ka•ahani gimin ua dingtangmancha jolni MLA-ko aro WMB-ni chairman-koba mittelpilangaha.
Sorkarini a•bachengatgipa kamrangni gimin jolni manderangna talataniko on•angengon, Nengkhra-Williamnagar ramako taridapna, Williamnagar Water Supply Project-ko a•bachengatna aro uandakgipa gipin kamrangna sorkari da•o tangka paisarangko chamengaha ine Chief Minister parakataha.
