Williamnagar, Mar 19: Budbar salo, Tura-ni Bishop, Right Rev Andrew R Marak-ni dilanichi Williamnagar-ni gital Sacred Heart gilja nokko nokdonggaaha aro ia gilja nokko nokdonggaanio, Auxiliary Bishop Most Rev Jose Chirackal, Meghalaya a•dokni Cabinet Minister Marcuise N Marak, Williamnagar-ni MDC Alphonsus R Marak, Tura-ni gitcham MP Agatha K Sangma, Songsak-ni gitcham MLA Nihim D Shira, dingtang dingtang dilgiparang aro Garo Hills gimikonin bang•bea Kristian bebera•giparangba dongpae bak ra•angtokaha.
Ia gilja nokko nokdonggana gita dingtangmancha Rongtalgipa Missa boliko Bishop Andrew R Marak dilangaha aro ia Missa bolio dingtang dingtang pamongrangba bak ra•angaha.
Rongtalgipa Missa boliko matchotani ja•man cultural program-ko ong•ate, ia gital gilja nokko nokdonggaanina jinma kusi ong•e maniangtokaha.
Ia program-ko ong•atanio, Bishop Andrew R Marak, Auxiliary Bishop Jose Chirackal, Cabinet Minister Marcuise N Marak, Williamnagar-ni MDC Alphonsus R Marak aro dingtang dingtang dilgiparangna, ia gital gilja nokko rikanio on•giltokahani gimin mittelpilanirangko parakangtokaha.
Ia tom•anio, Sacred Heart Church-ni Parish Priest Fr Anthony Tekanath, rimchaksoani kattarangko aganangengon, ia gital gilja nokko rikanio pilak nanga dakchakanirangko on•ahani gimin Bishop Andrew R Marak, Auxiliary Bishop Jose Chirackal, Cabinet Minister Marcuise N Marak aro jolo bading chiwalanio niksenggipa Georgeman S Marak-koba mittelpilangaha.
Ia tom•anio, Sacred Heart Church-ni gitcham Parish Priest Fr John Thomas-ba jinmana aganprakengon, ia mikkim gnangbegipa gilja nokko matchotna man•ahani gimin Fr Anthony Tekanath aro Williamnagar-ni pilak Catholic bebera•rimskarangna an•tangni namgipa skanirangko on•ange, uni Williamnagar-o dongmiting somoiko gisik ra•atpile aganaha.
Ia tom•anio a•dokni Cabinet Minister aro Williamnagar MLA Marcuise N Marak-ba tom•anio bak ra•giparangna aganprakengon, ia gital gilja nokko nokdonggana man•ahani gimin an•tangni kusi ong•aniko parakangenba, ia gilja nokko pattiachi rongtalatahani gimin bishop-rangko mittelpilangaha. Ia nokko be•en pil•atna man•ahani gimin Sacred Heart Church-ni Parish Priest, mondolini dilgiparang aro pilak Kristian bebera•giparangkoba Marak mittelpilangaha.
Ia program-ko ong•atanio, Auxiliary Bishop Most Rev Jose Chirackal-ba jinmana aganprakengon, ia gital gilja nokko nokdonggaanio dongpana man•ahani gimin an•tangni kusi ong•aniko parakatenba, ia nitobegipa gilja nokko rikanio jak donggipa construction committee, Parish Priest, Catholic sister-rang aro pilakkon mittelpilange, Europe a•songrango jekai gilja nokrang dal•dalgenchimoba gilja napgipa manderang bilongen komia. Uni gimin ia gilja nokko Europe a•songni gilja nokgita ong•atjachina aro chasongni chasongna gilja nokko bangbang ong•atjachina manderangko didiangaha.
Ia tom•anio mongsonggipa ong•e sokgipa, Tura-ni Bishop Andrew R Marak-ba jinmana aganprakangengon, Williamnagar-o maikai Catholic mondoli dal•rorobana man•aha, uarangni gimin janapangenba, Catholic nokdangrang bang•rorobaahani giminsa ia biapo dal•bate gilja nokko rikna nangaha ine parakataha.
Mikkangchiba Catholic nokdangrang bang•roroangkua ong•ode iana bate dal•batgipa gilja nokko rikna nanggen ong•jaode, salantian baditaba chang dake gilja ka•na gita Fr.rangko bariatskana nanggen ineba Bishop Marak aganaha.
Giljarangchi re•jringchina, an•tangtangni bebera•aniko bilakbatatchina aro Kristoni kamko ka•angkuchina gitaba ua Catholic bebera•giparangna agan-ku•pattianirangko on•angaha.
Indake ia tom•anio, ia Sacred Heart gilja nokna bilchi-jakchi, tangka paisachi aro dingtang dingtang dakchakanirangko on•giparangna mittelpilani chin gita mementos-rangko sualangjolaha.
Na·simang ia video-koba nina man·gen:
Na·simang iakoba poraina man·gen: Sanna bananio dakchakaniko on•na ‘CM Care+’ scheme-ko a•bachenga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
