Williamnagar, April 17: 2018 bilsioni 2022 bilsiona Williamnagar-ni MLA ong•e kamko ka•anio Marcuise N Marak, bang•a kamrangkon matchotgija 2023 bilsini Assembly election-na report card-ko tarienba manderangni vote-rangko bi•amaha ine Tennydard Marak minggipa mandeni Election Commission of India (ECI)-na badi ka•doaniko National People’s Party (NPP) Williamnagar unit raken jegalataha.
Iani bidingo talataniko on•angengon, 2018 bilsioni 2022 bilsiona Williamnagar-ni MLA Marcuise N Marak, bang•bea scheme-rangko aro namroro silroroani kamrangko Williamnagar constituency-na ra•baaha, jekon ua 2023 bilsini Assembly election-na skang an•tangni ‘Report Card’-o segatenba, uko jinmana aro Election Commission-naba mesokataha ine NPP Williamnagar unit-ni district general secretary Dominic Sangma parakatenba, uni report card-o mesokatgipa kamrangoni mitamkode matchotmanaha aro mitam kamrangkode da•o ka•engkuani gimin bakan matchotna siengaha ine talataniko on•angaha.
Williamnagar MLA-ni kosako iandake matnanggipa mandeni gimin janapatskaengon, an•tangko ‘political activist’ ine a•kangenggipa Nokgil A•we-ni Tennydard Marak, election-na skang ‘scrutiny’-ko dakani somoiode maini gimin maming complain ba badi ka•anirang donggija da•o election matchotani ja•manosa MLA-ko matnange uko ‘disqualify’ ka•china dabiskaaha ine NPP Williamnagar unit-ni district general secretary sing•doataha.
Iani bidingo NPP district unit-ni gita Sombar salo jinma tom•e chanchirimangenba, Williamnagar MLA-ni kosako tol•e bodnam ka•na jotton ka•ahani gimin raken jegalangtokaha ineba NPP Williamnagar unit-ni district general secretary Dominic Sangma parakataha.
