Williamnagar, Jan 21: Adita salrangna skang, Williamnagar-o gitcham MLA aro gitcham minister Deborah Marak depantegipani garichi scooty salgipa mande saksako chatinge siatgipani bidingo Hub News-o seaniko, GNLA bobil dolni gitcham chairman aro da·o Songsak constituency-o Congress candidate ong·e susaenggipa Champion R Sangma jegalatenba tol·e sakki on·na jotton ka·aha.
Ia a·sel ong·gipani bidingo ua social media-o manderangna tol·e sakki on·na jotton ka·engon, ia a·selni bidingo koborko man·soa bakan ua police station-ona aro ja·mano Williamnagar-ni Congress candidate Deborah Marak-ni nokona re·angaha indiba Marak-ni depante aro uni gari baksa maming a·sel ong·aniko ua nikejaha ine parakatahachim. Ia a·sel ong·aniko jegalatan baksana ua, Marak-ni depanteko rim·a ine koborrango seanikoba jegalatahachim.
Indake ong·genchimoba, ia gari a·sel ong·gipani bidingo Hub News-ni kobor ra·timgipa mandean, police-rango name kobor ra·chengesa iani bidingo koborko seatskaahachim aro gitcham MLA Deborah Marak-ni depanteko rim·ani giminba police-rangan name u·iatskaahachim.
Police-rangni kobor on·ani gitade, ia gari a·sel ong·ani salsa ja·man matnangako man·gipa gitcham minister-ni depante an·tangan police-rangna an·tangko bame on·eaha indiba ian jamin ra·na man·gipa case-sa ong·ani gimin dos dakgipa mandeko police-rang ja·mano jamin on·e watpilahachim.
Ia gari a·sel ong·gipani bidingo East Garo Hills Police-ni u·iatani gitade, re·anggipa January 17 tarik walni 9:20 bajimango, gipok gari bolsa, Williamnagar super market sambao, scooty bolsako su·gake, ja·mano ia biaponi katahachim.
Su·gakako man·e ia ML-13 0139 scooty-ko salenggipa Sengsrang B Marak, bilongbee saknaanirangko man·aha aro ja·mano uko sanna gita Williamnagar CHC-ona ra·angon ua janggi galahachim.
January-ni 18 tarik attamni 4:30 bajimango Ruchir C Marak, Williamnagar PS-ona re·ange an·tangko bame on·eskaaha. Bame on·eani ja·man uko medical examination-na watataha aro uni ku·rachakaniko ra·e police-rang ML-05N 2324 gariko sandiangon, ia gariko Rongonggre joloniko man·eaha aro joljol ia garikoba rim·aha.
Ia case-ara jamin ra·na man·gipa case-sa ong·ani gimin ja·mano police-rang, ia mandeko jamin on·e watpilaha.
Ia a·selni bidingo police-rang, Williamnagar PS case u/s 279/ 337/ 427/ 304A IPC-ni ning·o mokordomako segataha.
