Shillong, June 27: East Garo Hills a•jao Williamnagar-ni damgni gittimrango manderangni songdongenggipa sorkarini a•arangko niamo ra•gatna gita Sombar salo, Meghalaya Cabinet tik ka•angaha.
Sombar salo, Cabinet tom•a matchotani ja•mano kobor ra•timgiparangna talataniko on•angengon, Williamnagar-o manderangni songdongchakenggipa sorkarini a•arangko, 2002-2003 bilsio gitxham sorkarini tik ka•gimin gita niamo ra•gatna Cabinet tik ka•angaha ine a•dokni Chief Minister Conrad K Sangma parakataha.
Manderangni songdongchakenggipa sorkarini a•arangko niamo ra•gate, ia a•arango songdongenggipa manderang baksa songgigrikna gita 2002-2003 bilsion gitcham sorkari, tik ka•angahachim indiba 2003 bilsi dipet da•alonan iako a•dok sorkarirang ra•gatchipjahachim.
“Uni gimin da•alo chingni sorkari, ge 1200 nokdangrangni songdongenggipa Balsrigittim aro Warimagre gittimrangna ia niamko ra•gatna tik ka•angaha. Ia niamko ra•gatengon, chinga sorkarini a•ao songdongenggipa nokdang ge•anti baksa soi ka•grike ia a•arangko ru•uta somoirangna para dake on•gen indiba a•arangde sorkarini ong•aigen,” ine Sangma parakataha.
Nokdang ge•prakna sq ft 10,000-na batgija tik ka•manaha aro damde GHADC-ni tik ka•gimin gita ong•gen ine janapatengon, Warimagre-de first class a•a ong•ani gimin bigha-prako gong lak 2.50 aro Balsrigittim-de second class ong•ani gimin bigha-prako gong lak 1.87 ka•e tik ka•manaha aro iana agreba ia nokdangrangoniko jaanti parakoba ra•gen ine Chief Minister parakataha.
Chief Minister-ni parakatani gitade, ia ja•kuko de•anichi sorkari, Balsrigittim-niko gong kror 8-ni one-time revenue aro bilsio gong kror 2.67 kajina baksana Warimagre a•aoniko gong kror 4.5-ni one-time revenue aro bilsiprako gong kror 1 kajinako man•gen.
Tura jillaoba apsan daken sorkarini a•arango songdongenggipa nokdangrangoniko iandake korosrangko ra•gen ineba Chief Minister parakataha.
