Williamnagar, Apr 18: A·gilsakni gipin biaprango gitan Williamnagar-ni Sacred Heart gilja nokoba hajal kotok kristian bebe ra·gipamanderang, Jisu Kristoni manderangna chisolo sichakaniko gisik ra·na gita Sukrobar salo, Good Friday ba Rongtalgipa Sukrobar salko maniangaha.
Ia Good Friday-ni salo, Williamnagar Sacred Heart parishni bang·a manderangan pringnian pap ku·rachakna tom·bachengtokaha maina Catholic-rangni bebera·ani gitade, mande an·tangni papko ku·rachakanichi Jisu Kristoni mandena ka·sae sichakanio bak ra·na gita an·tangko tarisamsoani ong·a.
Ia pringni bako, Jisu Kristoni Skobikrok a·briona bon·kame re·mikkanganiko gisik ra·na gita ‘Way of the Cross’ ba ‘Chisolni Rama’-koba jinma dakangaha aro iano chona dal·a, butchuma budepa pilakan bak ra·angenba, Kristoko rim·chengaoni gopaona kingking dam 14 biaprangko ja·rikangaha.
Ia Chisolni Ramako Parish-ni Parish priest Fr Anthony Tekanath dilangaha aro mondolini bebera·giparang, mitamrangde Kristoni duk chakanina an·tangtangko sasti on·ani chin gita ja·rara bi·ani baksa re·jomangaha. Jinma re·jome bi·engmiting somoio git ring·anirang aro Sastroni kattarangko poraianichi ia salko dingtangmanchagipa ong·ataha.
Catholic-rangni bebera·ani gitade, ia Good Friday-ara gisik ra·ani salmangmangsan ong·aija indiba Isolni ka·saaniko Chisolchi parapeaniko bebera·na okamaniba ong·a. Ian okumu chake bi·ani aro kalimani sal ong·a indiba ia salara Jisu Kristoni tangchapilanina ka·dongani baksa nisoani salba ong·skaa.
Ia salko manianio parish-ni father, tom·bimonggiparangna aganprakengon, bebera·giparangni janggi tanganio Chisolni gamchataniko talate on·angaha. Good Friday-ni salara Jisu Kristoni saknaani aro sianichi a·gilsakko piokaha ine gisik ra·atani sal ong·a ineba Fr Tekanath aganaha.
“Kristoni mandena ka·saaniara aiao inmangipa ong·a aro uni on·kanganiara mande sakantinan ong·a. An·ching pilakan an·tangtangni Chisolko ra·e uko ja·rikchina okamako man·giparang ong·a,” ine Parish pamong aganaha.
Bon·kamao bebera·giparang Chisolko olakkiangtokaha, jeon Parish-ni manderang, Chisolo datkapa man·gipa Jisu Kristoni ja·ako dangtapna aro ku·dimna re·mikkangbatokaha. Ian Jisu Kristoni Chisolo sichakanina ka·sae mesokani aro mittepilskaani chin ong·a.
Na·simang ia video-koba nina man·gen:
Na·simang iakoba poraina man·gen: Assam-Meghalaya sima ari jolo mande aro mongmani gisepo nanggrikanio mande saksa janggitangko gimaata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
