Shillong, Sep 6: Meghalaya a•doko skanggipa changna Shillong songjinmani Woodland Hospital-o ‘Plasma Exchange’-ko chu•sokataha. Ia Plasma Exchange-ko hospital-ni doctor-rang, bilsi 39 ong•gipa me•chik saksao dake chu•sokataha.
Woodland Hospital-ni Consultant Nephrologist Dr Indakiewlin Kharbuli-ni talatani gitade, ia Plasma Exchange-ara an•chiko rongtalatani bewal gitasa ong•a, jeon mandeni plasma ba rong donggijagipa an•chiko dialysis machine ba ostrorangchi bodolna gita man•a.
Ia kamko ka•anio minute 20-mangsan nangaia aro ia plasma exchange-ko dakanichi namgijagipa an•chirangko, gital an•chi baksa bodolna man•a ineba Dr Kharbuli parakataha.
Dr Kharbuli-ni parakatani gitade, Plasma Exchange ka•ako man•gipa me•chikara Thrombotic Thrombocytopenic Purpura (TTP) minggipa sabisiko man•ahachim aro uko Plasma Exchange dakani ja•man da•o ua kenna nangaoni jokaha.
“Ia TTP-ara namen kenbegnigipa sabisi ong•a aro namgipa sanna banani gride ia TTP-ko man•gipa manderang, an•chi ong•e aro gipin saknaanirangko man•e 90 percent-de siangna gita man•aia,” ine Dr Kharbuli parakataha.
