Tura, Aug 25: Pradhan Mantri Ujjwala Yojana (PMUJ) 2.0-ko Budbar salo, Meghalaya a·dokni Chief Minister Conrad K Sangma, Tura-o a·bachengate on·angaha aro ia scheme-ko a·bachengatanio West Garo Hills a·jani Deputy Commissioner Ram Singh-ba dongpaaha.
Ia scheme-ni ning·o PMUY connection-na India sorkarini gita tangka paisarangko dakchake on·enga aro uan kg 14.2 ong·gipa cylinder-na gong 1600 aro kg 5 ong·gipa cylinder-na gong 1150 ong·enga. Tangka paisani gita dakchakaniko on·anio Cylinder-ni security deposit-na – kg 14.2-na gong 1250 aro kg 5 ong·gipa cylinder-na gong 800 ong·gen. Iana agreba, pressure regulator-na gong 150, LPG hose-na gong 100, Domestic Gas Consumer Card-na gong 25, Inspection/Installation/Demonstration-na gong 75-koba on·ani donggen.
PMUY-o biming segatgimin manderangna, tangka deposit ka·ani gri connection-ko on·an baksana Oil Marketing Company (OMC)-rangni gita skanggipa LPG refill aro Stove (hotplate)-koba tangka paisa gri indin on·anggen.
Ia Ujjwala scheme-ara fuel retailer-rangna tangka paisako deposit ka·na nanggija song·a channani gas cylinder-rangko on·enggipa scheme ong·achim.
Ia scheme-ni ning·o SC/ST, PMAY, AAY, onbatsranggipa gadang, cha bagan, buringrango donggipa aro chichangrango donggipa me·chikrangkoba man·chapatna gita ia scheme-ko 2018 bilsini April jao apalbatatahachim.
Ia PMUY-ni beneficiary-rangko 2011 bilsini Socio-Economic Caste Census List-o pangchake segatahachim.
Ia PMUY 2.0 ba gnigipa bakko a·songni Prime Minister Narendra Modi, 2021 bilsini August 10 tariko a·bachengataha aro ia scheme-ni gnigipa bako million 10 beneficiary-rangko segatdapna nisanko donsoenga.
Ia PMUY-ni gnigipa bako bimingko segatna gita lekkani kamrang komibataha aro bimingko segatna gita dongchakani biap ba ration card-rangko nangjawaha.
Ia Ujjwala 2.0-o bimingko segatna nangchongmotgipa kamrangara, dorgastoko galgipa me·chik ong·na nanggen, BPL nokdango segatgipa ong·na nanggen, dorgasto galgipa bilsi 18 gapgimin ong·na nanggen, bank account nombor aro IFSC code dongna nanggen, dorgastoko galgipa nokdango gipin LPG connection dongna nangjawa, Identity-na dorgastoko galenggipani Aadhar card aro BPL ration card-ko mesokna nanggen aro nokdangni gadangko mesokna KYC dongna nanggen.
