Shillong, Dec 06: 1971 bilsio dal·begipa dakgrikani ong·ao janggitangko on·chake sianggipa matgrik aro Veer Chakra award-ko man·gipa Lt Col Patric Lawlor sagini jikgipa aro segipani siani ja·man segri ong·rikgipa Ma Doris Z Lawlor-ko dingtangmancha mande ra·pilskaaniko dakna gita, NCC Directorate NER Shillong, Sombar salo North Eastern NCC HQ-o tom·aniko ong·atangaha. Dingtangmancha mande ra·ako man·na kragipa sokgipako unsomoio Shillong Group-ni Group Commander Brigadier Jai Singh Yadav-chi mande ra·bee rimchaksoaniko dakangaha.

Ma Lawlor, salni tom·aniko mikkim gnangatan baksa NCC cadet-rangko mande jinmao de·mittelange a·songko ku·cholsan ong·atanina aroba pilak dakgipa ra·bianirang aro kengni-jajrenggnirangoniko a·songko chelchakani kamrangko bimchipe ka·angkuchina gita didianiko on·angaha.

Iani ja·man cadet-rang, a·songna ring·mittelani gitko mande jinmani mikkango ring·e mesokangaha aro bon·chotao, a·songni git ba national anthem-ko jinma apsan doka-damanirang baksa ring·e tom·aniko matchotataha.