Shillong, Dec 10: 2016 bilsio ra•gatgipa Meghalaya Residents Safety & Security Act (MRSSA)-ko ra•bapilchina aro a•doko Inner Line Permit (ILP)-ko ra•gatanio dakchakanirangko on•china mol•mole, Bristibar salni bako Opposition dolni dilgipa Mukul Sangma, Meghalaya a•dokni Governor Satya Pal Malik-ko grongeaha.

Meghalaya Residents Safety & Security Act 2016-ko ia 2020 bilsio Meghalaya sorkari taridapahachim.

“Chingni mol•molanirangko name knatimahani gimin chinga Governor-ko mittelpilna ska,” ine Mukul, Governor-ko grongani ja•mano kobor ra•timgiparangna parakataha.

Meghalaya a•doko ILP-ko ra•gatna nangengani gimin ua a•selrangko Governor-na agan-talate on•aha ineba Mukul parakataha.

“Meghalaya a•doko ILP-ko ra•gatani bidingo baditaba bilsirangna dingtang dingtang dolrang baksa agangrikaha,” ine Meghalaya a•dokni gitcham chief minister aganaha.

A•songo Citizenship Amendment Act (CAA)-ko ma•mong sorkari ra•gatani ja•man salgro salaram a•dokrangona gipin a•songrangoni manderang napdrabana kenchaktokengani gimin Meghalaya a•doko ILP-ko ra•gatani bidingo ma•mong sorkari baksa agangrikchina gitaba ua a•dokni Governor-ko mol•molangaha.